Noé arcata ruwan
9 yachachiy
Noé arcata ruwan
NOEQA warmiyuq, 3 wawayuq, ima karqa. Wawasninqa Sem, Cam, Jafet ima, sutichakurqanku. Kimsantintaq casarakurqanku. Jinamanta Noep ayllun pusaq runayuq kasqanta nisunman.
Diosninchik Noeta mana jaykʼaq riqsikusqanta ruwananta kamachirqa. Noeqa juk jatun arcata ruwanan karqa. Kay arcaqa juk jatun barcojina karqa, chhuqu cajaman rikchʼakurqa. Dios nirqa, ‘kimsa alto patasniyuqta ruway, ukhunpitaq familiaykipaq, animalkunapaq, mikhunapaq ima, achkha cuartosniyuqta ruwallaytaq’, nispa.
Noeqa arca yakupi tuytunanpaqjina ruwanan karqa. Dios nirqa, ‘ñuqaqa yaku kay pachata pʼampaykunankama jatun parata parachimusaq, ajinamanta kay Jallpʼamanta tukuyta chinkachichkaq, nispa’.
Diosta kasukuspa, Noé wawasninwan, arcata ruwayta qallarirqa. Wakin runataq asikullarqanku. Noeqa Dios parachimunanmanta runaman willachkaptin, mana pipis creerqachu.
Arca may jatun kasqanrayku, may unaypi ruwarqanku. Chaymantataq, Diosninchik animalkunata arcaman yaykuchinankuta nirqa, wakinkunamanta iskayta, juk urquta juk chinatawan, wakinkunamantataq qanchista. Chantapis tukuy laya pʼisqitusta arcaman apaykunanku karqa. Noeqa Diosninchik nisqanmanjina, kikinta ruwarqa.
Chaymantaraq, Noé familianwan arcaman yaykurqa. Chantapis, Dios arcap punkunta wisqʼaptin, Noé familianwan paramunanta suyayta qallarinku. Chay ukhupi kasqaykita tʼukuriy. ¿Dios may jatun parata parachimunmanchu karqa?
