NOÉ nigiʼdaa mbáwíi a̱ʼgiu̱u̱ ma̱ngaa ajtsíin e̱ji̱i̱n. E̱ji̱i̱n nigu mbiʼñún Sem, Cam ga̱jma̱a̱ Jafet. Mámbáa a̱ʼdióo nigiʼdaa a̱ʼgiu̱u̱. Ikha jngó naʼni mbá migiñuʼ xa̱bu̱ bi̱ kuwa náa goʼwóo Noé.

Dios niʼni rí Noé maʼni mbá rí na̱nguá kujmaa kayuʼ. Niʼthúu̱n rí maʼni mbá arca mba̱a̱. Arca rígi̱ ninindxu̱u̱ xóo kaʼnii mbá barco, ikha kayuʼ xóo mbóo e̱jna̱ mba̱a̱ ga̱jma̱a̱ mbaaʼ wéñuʼ. Dios niʼthúu̱n: ‹Atani ajtsú karnguxi, ma̱ngaa atani mbaʼa cuarto›. Cuarto rígi̱ maxtáa Noé ga̱jma̱a̱ bi̱ kuwa náa goʼwóo, mangiin xujkhúʼ ga̱jma̱a̱ ganitsu rí mu̱phu̱ xúgínʼ.

Dios niʼthúu̱n Noé xú maʼni arca mu xáto̱ʼo̱o̱ iyaʼ. Niʼthí: ‹Makuʼnguánʼ ruʼwambiiʼ mu manimbáti̱ga̱a̱ xúgíʼ numbaaʼ. Bi̱ nda̱wa̱a̱ náa arca makhañúu›.

Noé gajmíi̱n e̱ji̱i̱n ninimbu̱ún rí niʼthí Dios ma̱ngoo nigi̱ʼdi̱i̱ ni̱ni̱ arca. Mú eʼwíínʼ xa̱bu̱ i̱ndó nindu̱ʼwa̱. Ninindxu̱ún má xúʼko̱ mixkawiinʼ. Nimbáa táʼnimbo̱o̱ índo̱ rí Noé niʼthún rí wíji̱ maʼni Dios.

Numuu rí arca rígi̱ ra̱ʼkhá tháán mba̱a̱ niʼni, ikha jngó mba̱yu̱u̱ʼ niguma. Nda̱wa̱á rí ninújngoo mba̱yu̱u̱ʼ tsiguʼ, asndu ikhú niguáxi. Ikhú Dios niʼthúu̱n Noé rí makudiinʼ xujkhúʼ ikhí. Niʼthúu̱n rí makudiinʼ majmi̱i̱n tikhun enii xujkhúʼ, xujkhúʼ i̱ya̱ ga̱jma̱a̱ xujkhúʼ a̱ʼgu̱. Mú rí eʼwíínʼ xujkhúʼ, Dios niʼthúu̱n rí makudiinʼ juwiin mbámbáa. Ma̱ngoo niʼthúu̱n Noé rí ma̱ʼkha̱ kagu̱u̱n ikhí xúgínʼ enii ñu̱ʼu̱. Noé niʼni ikha kayuʼ xóo má niʼthúu̱n Dios maʼni.

Nda̱wa̱á, Noé gajmíi̱n bi̱ kuwa náa goʼwóo nitu̱ʼu̱u̱n náa arca. Ikhú Dios nirugua̱a̱ xkrugua. Náa awúu̱n arca, Noé gajmíi̱n bi̱ kuwa náa goʼwóo niguaʼti̱i̱n. Atatsaʼwáminaʼ rí xtaa ikhí, xtaʼti̱i̱n. Lá maxnúu ruʼwambiiʼ xóo niʼthí Dios maʼni ráʼ.