TI NOEE oy jun yajnil xchiʼuk oy oxib yalab xnichʼnabik. Li alab nichʼnabiletik taje, jaʼ sbi Sem, Cam xchiʼuk Jafet. Leʼe oy yajnilik. Jech oxal vaxakvoʼik li ta yutsʼ yalal Noee.

Ti Noee oy kʼusi yan x-elan akʼbat spas yuʼun Dios. Albat ti akʼo spas jun mukʼta arkae. Li arkae toj mukʼ jech kʼuchaʼal jun varko, pe jaʼ mas xkoʼolaj yilel ta mukʼta natil kaxa. Oxkoj staylej xchiʼuk ep ta kʼol skuartoal xa pas, x-utat yuʼun ti Diose. Li kuartoetik taje jaʼ chtun sventa Noé xchiʼuk yutsʼ yalal, sventa chonetik xchiʼuk chtun ta skʼejobil sveʼelik.

Li Diose xi la jyalbe li Noee: Li arka cha pase mu x-och voʼ ta yut xa pas. Jech la jyal xtok: Ta jtak tal jun mukʼta nojelal ta voʼ sventa ta xkakʼbe slajeb skotol li lume. Ti buchʼu muʼyuk te oy ta yut arkae ta xcham.

Ti Noé xchiʼuk xnichʼnabtake la xchʼunbeik smantal ti Diose vaʼun lik spasik li arkae. Pe li yan krixchanoetike, kʼajomal noʼox tseʼej la jyaʼiik. Muʼyuk la jyikta sbaik ta spasel li kʼusitik chopole. Kʼalal la jyal Noé li kʼusi snopoj tspas ti Diose, muʼyuk buchʼu la xchʼun.

Li arkae jalij ta spasel ta skoj ti toj mukʼe. Ep jabiletik echʼ, vaʼun itsuts yuʼunik. Tana un, ti Noee albat yuʼun Dios ti akʼo stikʼ ochel li chonetike. Albat ti akʼo stikʼ ochel chaʼchaʼkot jlom chonetik ta jujutos, jkot stot xchiʼuk jkot smeʼ. Pe ta yan chonetike albat Noé ti akʼo stikʼ ochel vukkot ta jujutos. Li Noee albat noxtok ti akʼo xikʼ talel skotol li jel tos mutetike. Noé la spas skotol jech kʼuchaʼal albat yuʼun ti Diose.

Ta tsʼakal ne, li Noé xchiʼuk li yutsʼ yalale ochik ek li ta arkae. Vaʼun ti Diose la smakbe stiʼ li arkae. Li Noé xchiʼuk li yutsʼ yalale te smalaojik ta yut. Nopo ti te yakal cha mala eke. ¿Mi ta van xtal li Nojelal ta voʼ kʼuchaʼal yaloj ti Diose?