NOÉ yéetel u yataneʼ yaan kaʼach óoxtúul u paalal. U kʼaabaʼ u paalaloʼobeʼ, Sem, Cam yéetel Jafet. Tu óoxtúulal tsʼoʼokaʼan u beeloʼob kaʼachi. U kʼáat u yaʼaleʼ, ichil u familia Noeiʼ ocho utúulaloʼob kaʼachi.

Dios túuneʼ, tiaʼalaj tiʼ Noé ka u beet upʼéel baʼal maʼ yáax ilaʼaniʼ. Tiaʼalajtiʼ ka u beet upʼéel nojoch cheem. Le cheemaʼ ka tsʼoʼok u beetaʼaleʼ bey upʼéel nojoch caja chowakeʼ. Dioseʼ tiaʼalaj tiʼ Noé: óoxpʼéel u pisoi ka beete, yéetel beet u cuartoiloʼob. Le cuartoʼoboʼ utiaʼal u yantal kaʼach Noé yéetel u familia, utiaʼal xan le baʼalcheʼoboʼ yéetel utiaʼal u líiʼsik u yoʼochoʼob.

Dioseʼ tiaʼalaj tiʼ Noé bix ken u beet le cheem utiaʼal maʼ u yokol jaʼoʼ. Tiaʼalaj: In kaʼaj in taas upʼéel nojoch búulkabal utiaʼal in xuʼulsik tiʼ tuláakal baʼal kuxaʼan. Le maʼ kun ookloʼob ichil le cheemoʼ yaan u kíimloʼob.

Noé yéetel u paalaleʼ tu beetoʼob baʼax tiaʼalaj Dios, ka túun tu káajsoʼob u beetkoʼob le cheemoʼ. Baʼaleʼ, u maasil le máakoʼoboʼ chéen tu cheʼejtoʼob. Maʼ tu xulaj u beetik u kʼasaʼaniloʼobiʼ. Le ka tiaʼalaj Noé tiʼob baʼax ken u beet Dioseʼ mix máak oksaj óoltej.

Tumen jach nojoch le cheemoʼ, yaʼab kʼiinoʼob tu bisaj u beetaʼal. Máan yaʼab jaʼaboʼob ka páajchaj u tsʼoʼoksaʼal. Ka tsʼoʼokeʼ, Dioseʼ tiaʼalaj túun tiʼ Noé ka u yoks le baʼalcheʼob ichil le cheemoʼ. Tiaʼalajtiʼ ka u yoks kaʼakatúulil u jejeláasil le baʼalcheʼoboʼ, u xiibil yéetel u x-chʼuupil. Baʼaleʼ, Dioseʼ tiaʼalaj tiʼ Noé ka u yoks a siete tiʼ uláakʼ baʼalcheʼoboʼ. Tiaʼalaj xan tiʼeʼ ka u yoks tuláakal u jejeláasil chʼíichʼoʼobiʼ. Noeiʼ tu beetaj jach jeʼex aʼalaʼabik tiʼ tumen Diosoʼ.

Ku tsʼoʼoleʼ, Noé yéetel u láakʼtsilileʼ ookoʼob xan teʼ cheemoʼ. Dios túuneʼ tu kʼalaj u joonai. Ichileʼ, Noé yéetel u láakʼtsilileʼ yanchaj u páaʼtajoʼob. Tukult tiaʼanech ichil táan a páaʼtajeʼ. ¿Yaan wa u taal upʼéel búulkabal jeʼex úuchik u yaʼalik Dioseʼ?