NOÉ goyoʼ toib tzeelbu né tzón xiimbu. Xiimbu góc laa Sem, Cam né Jafet. Guionca xiimbu goyoʼ tzeʼel. Guirá family xtunybu gocyibu xhoon.

Dios buny que Noé nasaʼ toib cós ni diti ma bibiʼ buñ dzúcu. Gochbu Noé nasaʼ toib arca rodann. Arca reʼ gocni nirodann xomod toib bark o xomod toib caj rodann né sioʼol. Dios góoch láabu: Buny láani de tzón píis, né bisaʼ cuart lainyni. Cuart cú góc par Noé né xhomilbu, par nimal né galrro par guiráyibu.

Dios gochbu Noé que nasaʼ tzaaybu láani par diti labúu ñoʼ nís lainyni. Dios goní que guitnébu toib guiérodann par guinitlobu buñ ni noʼ guidopynac ló Gudxlio, ni diti noʼ lainy arca cú saity.

Noé né guirá xiimbu bisobdiitzyibu ni ná Dios né gosaloyibu bisaʼbu arca cú. Per stipnés buñ cú nosi bixiich láabu. Diti bisianyibu ni nacyibu. Diti noʼ chú biluladx órni Noé goní ni Dios gony.

Arca reʼ nirodann gocni por ngú gócla par goyaʼni. Goduidy xidal íz par bilox goyaʼ tzaayni. Dzú ni ma biloxni, Dios gochbu Noé que nagoʼbu chop de tipnés clas nimal lainyni, toib ningol né toib nigonaʼ. Stipnés clas nimal, Dios góoch láabu que nagoʼbu gatz. Láaca gochbu Noé que nagoʼbu lainy arca guirá clas nimal ni rasapy. Noé buny guirá ni Dios góoch láabu.

Órni ma bilox bunybu guirá ndeʼ Noé né xhomil láaca goyoyibu lainy arca. Bilox góc guirá ndeʼ Dios bisieg xpuertni. Ma ni noyibu lainyni Noé né xfamily golésyibu. Buny pensary que looy nóolo lainyni né cabéslo. ¿Nigolú sieed toib guiérodann ni Dios goní la?