DULEMAR arca yaba dogsasurmaladdina, anba gannar yobi na gudigusmala. Anba Dii Dummad wioye soglesad bengubuggwa gudmala. Agga bur bule allismalar gebed. Auggine sanar gussuli alled iedmala.

Uggiarmaggale dii wiali. Igi dule bormo gine dii eyoge, aa yobi dii wiali. ¡Noé nue nabir sogsa! Auggine Jehová nue arca wagag edusad, aa gala geg dule wargwensaar bar yabali doged.

Sanar gussuli negmaddugana dogde. Diwar dummagan nomaidyob daglegena. Sabbi dummagan olamai geb aggwa dummagan ebibbimai geb binnasur uurmagmai gusa. Dulemar gwaggidmala. Neg bur maddusulidse naggwismala. ¡Mandur nabedye goddemala, ibigala an Noé bali igar sassurdibeye binsadmala, anba we arca wagag argasigua, ibigar an dogsasurdibeye! Ar emisgindi bad sorbar gusa.

Dii engumai gude. Dii 40 días wisa, winaidbii osedosdae geb oibosdabali. Yarmar dogde, anba yar dummaganse baggale dogmai gusa. Babdummad sogsad yobi gusa, dulemar arca yaba dogsasurmaladi, geb ibmar durgan dogsasurmarmogadi, bela burgwismala. Ar bela arca yaba bugmaladdina, bendaglesmala.

We arca sobsad bali Noé e masmala bogwa arbaed nued imasmala. Dii engudgua, arca muamagnai gusa. Degiid gine, negyorgusgua, Dad gaarsunna. ¡Ber negdaarmagsii gusa! Unnilagwa arcabii dermar yagine muamagnai daglege. Dermar maddabii ber negebiris nai.

Bar dule dummagan gudisuli. Dule bamalad oaggalomalaga bar noniggosurmala. Bergwable e nanganba burgwismala, geb dule bamalad isganamala burgwismarmoga. Auggine e babgandi, ¿igi gusmarsunna?

Ar dule dummagan e babgandina dulemar anmargiid sulina. Ángelmar Nabbanegse agdenonimaladdina, dulemar yobi gudigumalaga. Aagala Dii Dummad wisgua, dule bamaladbali emar dina burgwissurmala. Bar sanar gussurmala geb gannar ángelga gusa nibnegse nadmala. Auggine bar odolessurmala Babdummad ángelmar abargine. Nia e ángelmarga gusmala. Biblia gine niamarye we ángelmar onugsalemala.

Emisgi Babdummad burwa megeg imasa, geb dii binnabinna dingumai gude. Nii waladdar gusgua, arca yar birgi megnoniggi. Undarad gine, arca yaba bugmalad nabir negmagab addasmala, degine, yarduggumar daggarmalad. Degi, dii dingumai gude.

Degid gine Noé, siggwi sidsid arca yabali siidi barmisa. We siggwi isse guggudi gusdae, geb gannar nonidae ar sigwed neg amisulidba. Weyob balibali guggudii gusa geb arca birgine gannar signonidae.

Noé wisgubiena bule nabba dingusdibeye, sorbali aagala nuugwa arca yaba siid barmisa. Gannar nuugwa nonimoga, sigwed neg amissulidba. Irbo gine gannar Noé nuugwa barmisbali, geb nuugwadi gannar nonibali, emisgi olivo gagan senoniggi. Neg bad dingumai. Noé gannar nuugwa barmisbali, ilabaa gude, geb emisgindina nuugwa negdinnagwad sigwega aminonisunna.

Emisgine Babdummad, Noé gala sunmagsa. Ega sogsa: ‘Arca gine noe. Bergwable be gwenadgan be bali be sede, geb anba ibmar durgan sedbalo’. Birgagwen obissa, arca yaba buggusmala. ¡Ibiyobi weligwar iddosmala, burgwissur negmagaba nosmaladba!