EHUNGI 10

Omupupo omunene

PENDJE yotjitendeze, ovandu va kayenda kumurungu nehupo rawo tjimuna rukuru. Owo ngunda kava ri nongamburiro kutja Omupupo mau ya. Owo ngahino aave yoro tjinene. Nungwari tjimanga va isa okuyora.

Tjimanga ombura ya uta okuroka. Oyo ya randata okuza keyuru tjimuna omeva ngu maye tirirwa okuza motjiyaha. Noa wa hungira ouatjiri! Nungwari oruveze rwa kapita ku kangamwa auhe okuhita motjitendeze. Jehova wa pata omuvero okupamisa nomasa.

Tjimanga ehi arihe ra koverwa i omeva. Omeva ya uta okumunika tjimuna onḓonḓu. Oyo ya wisa omiti nu ya undura omawe omanene nu aaye tjiti orurokoho tjinene. Ovandu aave tira. Owo va ronda kovitumbehi. Owo ngahino va ri nonḓero kutja andaku va puratena ku Noa nave hiti motjitendeze ngunda omuvero awa ri kamwaha ku wo! Nungwari nai pa kapitwa.

Omeva aaye ririre ko omengi. Oure womayuva nouṱuku 40 omeva yarandata okuza keyuru. Oyo ya ronda komikuro vyozondundu, nu tjimanga ozondundu ozonde tjinene zakoverwa. Otja Mukuru pa hungira, ovandu avehe pendje yotjitendeze va koka. Nungwari avehe mba ri moukoto va yamwa.

Noa novazandu ve va ungura otjiungura otjiwa mokutunga otjitendeze. Omeva ya yera otjitendeze, na tji tendeza kombanda yomeva. Okuzambo eyuva rimwe, ombura tji ya za nokuroka, eyuva ra uta okuyera. Arikana ombunikiro ombwa pu pe ṱa pi! Akuhe kwa ri okuvare kumwe okunene. Nu otjiṋa tjaatji yenene okumunikwa tja ri otjitendeze uriri tjaatji tendeza kombanda.

Ovarenaka nambano va koka. Owo kava ri po rukwao okuhihamisa ovandu. Owo avehe nooina, novandu avehe ovavi va ṱa. Ooihe va tjitwa vi?

Ooihe wovarenaka kava ri ovandu tjimuna eṱe. Owo va ri ovaengeli mbe ya okuhupa otja ovandu kombanda yehi. Mena ranao Omupupo tji we ya, owo kave na pu vaṱa puna ovandu avehe. Owo va isa okuungurisa otutu twoundu tu va ri nato, nave yaruka keyuru otja ovaengeli. Nungwari owo kave na pu va yandjerwa okukara norupa meṱunḓu raMukuru rovaengeli. Okutja owo va rira ovaengeli vaSatana. Owo mOmbeibela ve isanewa ozondemone.

Mukuru nambano wa vingisa ombepo, nu omeva womupupo ya uta okuwa pehi. Kombunda yomieze vitano otjitendeze tja haama kombanda yondundu. Omayuva omengi ya kapita, nu imba mba ri motjitendeze aave yenene okutara pendje nokumuna ozondomba zozondundu. Omeva ya yarukira ko pehi.

Okuzambo Noa wa hinda okazera okazorondu ku ke isanewa ekwara okuza motjitendeze. Oko ka tuka okuyenda nokukotoka, mena rokutja kaake munu oruveze oruwa okuhaama ko. Oko ka tjita nao povikando ovingi nu otjikando atjihe tji ka kotoka, aake haama kombanda yotjitendeze.

Noa aa vanga okutjiwa kutja omeva kombanda yehi ya pukurukwa, okutja okuzambo wa hinda onguti okuza motjitendeze. Nungwari onguti ya kotoka wina mena rokutja oyo kaai munu oruveze okuhaama po. Noa we i hinda otjikando otjitjavari, noyo ya eta eso romuṋinga motjinyo tjayo. Okutja Noa aa tjiwa kutja omeva ya u pehi. Noa wa hinda onguti otjikando otjitjatatu nu otjikando tji yamuna oruveze okuhaama ko.

Mukuru nambano wa hungira kuna Noa. Eye wa tja: ‘Pita motjitendeze. Twaerera eṱunḓu roye arihe novinamuinyo.’ Owo va kara motjitendeze oure wokukapita ombura imwe. Eṱe matu yenene okuripura kutja owo tjiri va ri nonyuṋe okukara pendje yotjitendeze rukwao nokutja ve nomuinyo.

Genesis 7:10-24; 8:1-17; 1 Petrus 3:19, 20.

Omapuriro womakonḓononeno