TAQSIṬ TIS 10

Aḥemmal n waman

DI BEṚṚA n lbabuṛ-​nni, imdanen ţkemmilen tudert-​nsen am zik. Ugin ad amnen belli a d-​yas uḥemmal n waman. Ţmesxiṛen ahat akteṛ. Lameɛna qrib taḍṣa-​nsen a sen-​tuɣal d imeṭṭi.

Asmi ur bnin ara fell-​as, tebda tekkat lehwa. Kra kra, ikkat-​ed ugeffur d iceṛcuṛen. Ayen akk i d-​yenna Nuḥ yeḍra. Lameɛna tura dayen ifut lḥal, ulac win izemren ad ikcem ɣer lbabuṛ-​nni. Yahwa izemmem mliḥ tawwurt.

S lemɣawla, uɣalen waman-​nni d isaffen imeqranen i gɣummen akk izuɣar (luḍa). Aman-​agi sseɣlin ttjuṛ, reffden srusun iẓra imeqranen yerna xedmen aṭas n lḥess. Imiren imdanen tekcem-​iten tugi, dɣa ulin ɣer imukan ɛlayen. Ah! Acḥal i nedmen tura imi ur ḥessen ara i Nuḥ yerna ur kcimen ara ɣer lbabuṛ-​nni asmi i mazal teldi tewwurt! Lameɛna tura ifut lḥal.

Aman ţzidin rennun. Ageffur ikkat 40 n wussan d 40 n wuḍan. Iḥemmalen n waman ɣummen tiɣaltin yerna leḥqen ula d ixfawen n idurar. Akken i t-​id-​yenna Ṛebbi, imdanen d lḥiwan meṛṛa yellan di beṛṛa n lbabuṛ mmuten. Lameɛna ḥaca wid yellan daxel-​is i gmenɛen.

Nuḥ d warraw-​is xedmen akken ilaq lbabuṛ-​nni. Asmi i t-​refden waman, yebda yeţţifrir. Yiwen wass, yeḥbes ugeffur dɣa iḍall-​ed yiṭij. Ayen akk i sen-​d-​yezzin yessewham! Lqaɛa meṛṛa tuɣal d lebḥeṛ ameqran. Ḥaca lbabuṛ-​nni i tezmer aţ-​ţwali tiṭ sennig waman.

Tura mmuten leɣwal-​nni. Ur ţţuɣalen ara ad qehren imdanen. Mmuten akk nutni ţ-​ţyemmatin-​nsen d yemcumen nniḍen meṛṛa. Lameɛna acu yeḍran d ibabaten-​nsen?

Ibabaten n leɣwal-​nni ur llin ara d imdanen am nekni. Llan d leṛwaḥ, yeɛni d lmalayek, i d-​iṣubben ɣer lqaɛa akken ad ɛicen am yemdanen. Asmi i d-​iwet uḥemmal n waman ur mmuten ara d yemcumen nniḍen. Ǧǧan lǧeţţa-​nni n wemdan i lsan, uɣalen s igenni am lmalayek. Lameɛna ur sen-​iɛemmed ara Ṛebbi ad uɣalen ɣer twacult-​is n lmalayekkat. Uɣalen d lmalayekkat n Cciṭan i geţţusemman leǧnun deg Wedlis Iqedsen.

Ṛebbi issker-​ed aḍu i d-​ihubben ɣef lqaɛa, dɣa bdan neqqsen waman. Ɛeddan xemsa wagguren d wamek i gers lbabuṛ-​nni ɣef yixef n wedrar. Mi ɛeddan kra n wussan nniḍen, wigad yellan daxel n lbabuṛ-​nni bdan ţwalin tiqucac n idurar. Aman ţkemmilen neqqsen.

Mbeɛd, Nuḥ iserreḥ i tgerfa ɣer beṛṛa. Tefferfer, lameɛna ur tɛeṭṭel ara tuɣal-​ed axaṭer ur tufi ara amkan iwulmen anda ara ters. Teţṛuḥu acḥal d abrid, lameɛna daymen teţţuɣal-​ed ɣer lbabuṛ-​nni.

Nuḥ yebɣa ad iẓer ma ṭṭaxxṛen waman ɣef lqaɛa, ihi iserreḥ i tetbirt ɣer beṛṛa. Titbirt-​nni tuɣal-​ed ula d neţţa-​t axaṭer ur tufi ara amkan anda ara ters. Nuḥ iserreḥ-​as abrid wis sin, tikkelt-​a tuɣal-​ed s yifer n tzemmurt deg yimi-​s. Swakka i geẓra Nuḥ belli wexxṛen waman ɣef lqaɛa. Nuḥ iserreḥ-​as i tetbirt-​nni abrid wis tlata, tikkelt-​a tufa amkan yekkawen, ɣef waya ur d-​tuɣal ara.

Tura Ṛebbi yenna i Nuḥ: ‘Ffeɣ si lbabuṛ, kečč ţ-​ţwacult-​ik. Ssufeɣ daɣen lḥiwan meṛṛa yellan yid-​ek.’ Nuḥ ţ-​ţwacult-​is qqimen daxel n lbabuṛ-​nni akteṛ n useggas. Nezmer a nxayel acḥal i feṛḥen mi d-​ffɣen ɣer beṛṛa yerna mazal-​iten ddren!

Laṣel n ddunit 7:10-24; 8:1-17; 1 Buṭrus 3:19, 20.