SANGHPAW li shinggan kaw e nga ai masha ni gaw, shawng na hte maren sha nga nga ma ai. Shau-ing ai hka kaba du wa na hpe, ya du hkra grai nkam ma ai. Shawng na hta grau nna, mani asawng ma ai. Raitimung kade nna yang nlu mani asawng masai.

kajawng sha marang hka kaba htu ru hkrat wa ai. Hka pung kaw na hka ru jaw dat ai zawn, lamu ntsa kaw na hka ru jahkrat dat ai.Noa tsun ai ga teng sai!. Raitimung Sanghpaw li kata de gadai mung nshang lu sai. Hpang hkrat mat sai. Chyinghka hpe chyat hkra Yehowa la kau sai.

Kade nna yang nem ai ga shara hkan e, hka lim mat wa ai. Hka ni mung hka nu ai zawn, tai wa sai. Hpun ni hpe mung ganawng gumpye kau ai hte, nlung tawng kaba ni hpe mung shachyai kau dat ai majaw nsen mung garu kachyi nga ai. Masha ni mung hkrit kajawng ma ai. Masha ni gaw tsaw ai kawng de hprawng lung ma ai. Noa ga hpe madat nna Sanghpaw li chyinghka naw hpaw nga yang Sanghpaw li kata de shang rawng yang mai na re ahka!,nga nna shanhte myit malai lu ma ai. Ya gaw grai hpang hkrat mat sai.

Hka hpung ni gaw grau grau tsaw lung wa ai. 40 ya 40 na lamu na marang hka kaba htu nga ai. Bum nhkrem hkan e, hka tung rawt lung wa ai sha n-ga, kade nna yang tsaw dik ai bum ni hpe pyi lim kau sai. Dai majaw Karai Kasang tsun da ai hte maren, Sanghpaw li shinggan e nga ai masha hkum shagu hte, dusat nhprang mahkra si ma ai. Raitimung Sanghpaw li kata e rawng ai ni asak lawt lu ma ai.

Noa hte shi a shadang sha ni Sanghpaw li shachyaw ai gaw, kaja mat sai. Hka hpung gaw Sanghpaw li hpe kaaw dat ai. Sanghpaw li mung hka ntsa e, waw taw nga ai. Lani mi na nhtoi hta marang hpawng ai hpang ajan mung pru wa ai. Mada dat u. Shara shagu hta nammukdara hka chyu sha pyi rai mat sai. De ntsa e sanghpaw li waw taw nga ai hta lai nna, hpa mung nmu lu sai.

Masha sha lawa ni mung nnga mat sai. Masha ni hpe nlu zing ri sai. Shanhte mahkra si mat sai. Shanhte a kanu ni gaw kaga n hkru n kaja ai masha ni hte rau, si lawm mat masai. Shanhte a kawa ni gaw hpa baw byin mat masai kun?

Masha sha lawa ni a kawa ni gaw anhte zawn shinggyim masha ni n rai ma ai. Ga ntsa de yu wa nna shinggyim hkum hkrang hpe sa dagraw la ai, lamu kasa ni rai mat ai. Dai majaw shau-ing wa ai shaloi, kaga masha ni hte rau hpawn nsi lawm ma ai. Shanhte gaw shinggyim hkum hkrang kaw na, lamu kasa hkrang bai galai la nna, sumsing lamu de nhtang lung mat ma ai. Raitimung Karai Kasang a lamu kasa dinghku hpung hta e, shang lawm na ahkang njaw sai. Dai majaw shanhte gaw Satan a lamu kasa ni tai mat ma ai. Chyum Laika hta shanhte hpe nat matse ni, nga nna shamying da ai.

Karai Kasang gaw nbung bung shangun dat ai hte, hka hpung ni yawm mat wa ai. Shata manga a hpang e, Sanghpaw li gaw bum pung ding langai mi a ntsa hta wa mara nga ai. Nhtoi tsawm ra mi lai wa nna, Sanghpaw li kata kaw na masha ni mung, shingan de yu dat yang bum pungding ni hpe mu lu ma ai. Hka hpung ni gaw matut nna, grau grau yawm mat wa ai.

Dai shaloi e, Noa gaw u hka mying ai u chyang langai mi hpe Sanghpaw li kaw na dat dat ai. U hka gaw jahkring mi sha pyen kawan hkawm nna, Sanghpaw li de bai nhtang wa ai. Hkring sa nga na shara hpe nmu lu ai majaw re. U hka hpe dat dat ai shagu lang gaw, ndai hku sha galaw nga ai. Sanghpaw li ntsa hta chyu wa hkring ai.

Ga ntsa na hka yawm wa sai kun, nga nna Noa chye mayu ai majaw, hkru du langai mi hpe, Sanghpaw li kaw na bai dat dat ai. Hkru du mung bai nhtang wa ai. Dung sa na shara hpe nmu ai, majaw re. Noa gaw hkru du hpe lahkawng lang ngu na bai dat dat ai. Hkru du gaw shi a manaw hte tsanlun lap langai mi di makrang wa ai. Dai majaw hka yawm hkrat mat wa sai lam hpe Noa chye nu ai. Noa gaw hkru du hpe masum lang ngu na bai dat dat ai. Hpang jahtum e, hkru du gaw hkun hkraw ai shara hpe mu nna nga nan mat sai.

Karai Kasang gaw Noa hpe tsun ai: ‘ Sanghpaw li kaw na pru wa mu. Na a kun dinghku masha ni hte, dusat ni hpe woi pru wa u’. Sanghpaw li hta shanhte rawng nga ai aten, laning mi jan ai. Shanhte yawng Sanghpaw li shinggan de pru nna, nga lu ai majaw kade daram pyaw na ma ai hpe myit yu ga.