MA KEʼXJAL xnaʼlebʼ li inkʼaʼ keʼok saʼ li jukubʼ kabʼl? Inkʼaʼ! Moko keʼxkanabʼ ta seʼek, xbʼaan naq inkʼaʼ keʼxpaabʼ naq tchalq li bʼutʼihaʼ.

Maakʼaʼ saʼ xchʼoolebʼ naq napujujnak li habʼ, chanchan hoybʼil rikʼin kukbʼ. Toj aran keʼxkʼe reetal naq yaal li kixye laj Noe! Abʼan maaʼani chik kiru chi ok xbʼaan naq li Jehobʼa kixtzʼap chiʼus li rokebʼaal li jukubʼ kabʼl.

Saʼ junpaat kibʼutʼunk li chʼochʼ, chanchan chik nimaʼ kiwulak. Kireekʼasihebʼ chaq li ninqi cheʼ, li ninqi pek ut kʼajoʼ xyaabʼ kixbʼaanu li nimaʼ. Ebʼ li poyanam keʼxuwak. Keʼtaqeʼk saʼ xbʼeenebʼ li tzuul. Naq keʼril chixjunil aʼin, keʼraj wank saʼ li jukubʼ kabʼl. Abʼan maakʼaʼ chik li hoonal.

Li haʼ yook chaq chi taqeʼk. Kixkʼe li habʼ chiru 40 kutan ut 40 qʼoqyink. Naq li haʼ kitaqeʼk kimuqunk chixjunil li ninqi tzuul. Kikʼulmank tzʼaqal joʼ kixye chaq li Yos. Chixjunilebʼ li inkʼaʼ keʼok saʼ li jukubʼ kabʼl keʼkamk. Abʼan li wankebʼ saʼ li jukubʼ kabʼl keʼkoleʼk.

Laj Noe ut ebʼ li ralal us keʼkʼanjelak. Li jukubʼ kabʼl kiwakliik saʼ xbʼeen li haʼ. Naq kiraqeʼk li habʼ, kiʼelk chaq li Saqʼe. Maakʼaʼ kikʼutunk saʼ xbʼeen li Ruuchichʼochʼ, kaʼajwiʼ li nimla palaw ut saʼ xbʼeen wank li jukubʼ kabʼl.

Keʼkamk li winq, li jwal nimebʼ roq rochbʼeenebʼ li xnaʼ ut chixjunilebʼ li maaʼusebʼ xnaʼlebʼ. Joʼkan naq, maaʼani chik trahobʼtesinq rehebʼ li qas qiitzʼin. Abʼan, kʼaru keʼxkʼul xyuwaʼebʼ li winq aʼin?

Li xyuwaʼebʼ li winq aʼin, moko joʼebʼ ta laaʼo xbʼaan naq aʼanebʼ musiqʼej. Ebʼ li musiqʼej aʼin keʼtibʼeloʼk naq keʼchalk saʼ Ruuchichʼochʼ. Joʼkan naq inkʼaʼ keʼkamk naq kibʼutunk li Ruuchichʼochʼ. Xbʼaan naq keʼmusiqʼoʼk wiʼ chik ut keʼsutqʼiik saʼ choxa. Abʼan li Yos inkʼaʼ chik kixkʼulebʼ. Keʼkanaak choʼq xʼanjel laj Tza. Li Santil Hu naxye naq aʼanebʼ li maaʼus aj musiqʼej.

Li Yos kixtaqla jun nimla iqʼ re naq tkubʼeeq li haʼ. Naq kinumeʼk oobʼ po, li jukubʼ kabʼl kikanaak saʼ xbʼeen jun li tzuul. Chirix chik aʼan, laj Noe ut li xjunkabʼal keʼok rilbʼal ruʼujebʼ li tzuul. Li haʼ yook chaq chi kubʼeek.

Chirix chik aʼan laj Noe kixkʼe chi rupupik jun li qʼeqi xul. Naq li xul aʼin kiʼelk chi rupupik, kisutqʼiik saʼ li jukubʼ kabʼl xbʼaan naq inkʼaʼ kixtaw bʼar tkanaaq.

Laj Noe kixtaqla jun li mukuy re xnawbʼal ma ak xchaqik li haʼ saʼ xbʼeen li Ruuchichʼochʼ. Li mukuy aʼin kisutqʼiik chaq ajwiʼ xbʼaan naq inkʼaʼ kixtaw bʼar tkanaaq. Naq kitaqlaak xkabʼ sut, kixkʼam chaq jun xxaq li cheʼ xbʼaan naq li haʼ yook chi kubʼeek. Laj Noe kixtaqla li mukuy saʼ rox sut, li mukuy inkʼaʼ chik kisutqʼiik xbʼaan naq kixtaw xnaʼaj.

Li Yos kixye re laj Noe: ‹Elen chaq saʼ li jukubʼ kabʼl. Kʼam laajunkabʼal ut ebʼ li xul›. Kixqʼax jun chihabʼ xwanjikebʼ saʼ li jukubʼ kabʼl. Kʼajoʼ keʼsahoʼk saʼ xchʼool naq keʼelk chaq saʼ li jukubʼ kabʼl ut naq keʼkoleʼk!