NJA ya thabina-rĩ, andũ maathiaga na mbere na maũndũ mao o ta hau kabere. Gũtirĩ hĩndĩ metĩkĩtie atĩ Kĩguũ no gĩũke. No mũhaka makorũo maathekaga ũndũ matarĩ maatheka rĩngĩ. O rĩmwe magĩtumia mĩtheko.

Kahinda gatarĩ coho-rĩ, maĩ makĩambĩrĩria gũitĩka. Maitĩkire kuuma igũrũ o ta ũrĩa ũngĩita maĩ kuuma ndoo-inĩ. Nuhu aarĩtie ma! No rĩu gũtiarĩ mweke o na atĩa wa mũndũ ũngĩ gũtonya thĩinĩ wa thabina. Mũrango waarĩ mũhinge ũkomithio ki nĩ Jehova.

O kahinda kanini ngurumo ciothe ikĩiyũra. Maĩ magĩtuĩka ta njũĩ nene mũno. Magĩgĩkururia mĩtĩ na kũgaragaria mahiga manene, na magĩtũma kũgĩe na mũrurumo mũnene mũno. Andũ magĩgĩtigĩra. Makĩhaica kũndũ kũrĩa kwarĩ gũtũũgĩru. Ũũi, meyũragia naarĩ korũo nĩ twathikĩrĩirie Nuhu, na tũtonye thĩinĩ wa thabina rĩrĩa mũrango waarĩ mũhingũre! No rĩu maakĩrĩ acerere mũno.

Maĩ magĩthiĩ na mbere kwambata o kwambata. Matukũ 40 mũthenya na ũtukũ maĩ magĩitĩka kuuma igũrũ. Makĩhaica ndere-inĩ cia irĩma, na kahinda kanini o na irĩma iria ndaihu igĩthikwo nĩ maĩ. Andũ othe magĩkua o ũndũ ũmwe na nyamũ iria itaarĩ thĩinĩ wa thabina o ta ũrĩa Ngai oigĩte. No arĩa othe maarĩ thĩinĩ makĩhonoka.

Nuhu na ariũ ake nĩ maarutĩte wĩra mwega wa gwaka thabina. Maĩ makĩmĩoya na igũrũ, na ĩkĩrera igũrũ rĩamo. Rĩu mũthenya ũmwe, mbura yakĩa-rĩ, riũa rĩkĩambĩrĩria kwara. Ĩ ndwarĩ ũndũ wa magegania! Kwarĩ iria inene kũndũ guothe. Kĩndũ kĩrĩa giki tu kĩonekaga kĩrerete igũrũ no thabina.

Rĩu marimũ maaminĩtwo biũ. Gũtirĩ hingo ĩngĩ maangĩakorirũo kuo magĩtuuria andũ. Othe nĩ makuĩte, o hamwe na maanyina mao na andũ arĩa angĩ maarĩ oru. No rĩrĩ, ũhoro wa maithe mao atĩa?

Maithe ma marimũ matiarĩ andũ ta ithuĩ. Maarĩ araika arĩa mokĩte gũtũũra ta andũ gũkũ thĩ. Kwoguo, rĩrĩa Kĩguũ gĩokire-rĩ, matiigana gũkua hamwe na andũ arĩa angĩ. Magĩtiga kũhũthĩra mĩĩrĩ ya kĩĩmũndũ ĩrĩa maarĩ nayo, na magĩcoka igũrũ marĩ araika. No matiigana gwĩtĩkĩrio o na atĩa gũtuĩka gĩcunjĩ kĩa famĩlĩ ya Ngai ya araika. Kwoguo magĩtuĩka araika a Shaitani. Thĩinĩ wa Biblia metagwo ndaimono.

Rĩu Ngai agĩtũma rũhuho rũhuhutũkane, namo maĩ ma kĩguũ makĩambĩrĩria kũhwa. Mĩeri ĩtano yathira-rĩ, thabina ĩkĩrũgama gacũmbĩrĩ-inĩ ga kĩrĩma kĩmwe. Matukũ maingĩ maahĩtũka-rĩ, arĩa maarĩ thĩinĩ wa thabina nĩ maangĩarorire nja na mone tũcũmbĩrĩ twa irĩma. Maĩ magĩthiĩ na mbere o makĩhũũaga.

Rĩu ningĩ Nuhu akĩrekereria nyoni ĩĩtagwo ihuru kuuma thabina. Rĩombũkaga gwa kahinda ningĩ rĩgacoka, tondũ rĩtingĩonire handũ hega ha kũũmba. Rĩaikarire rĩgĩĩkaga o ũguo na ihinda rĩrĩa rĩacoka-rĩ, rĩkomba igũrũ rĩa thabina.

Nuhu eendaga kuona kana maĩ nĩmaahwĩte, na kwoguo akĩrekereria ndutura kuuma thabina. Ndutura-rĩ, o nayo ĩgĩcoka tondũ ndĩigana kuona handũ ha gũikara. Nuhu akĩmĩrekia ihinda rĩa kerĩ, na ĩgĩcoka na ithangũ rĩa mũtamaiyũ mũkanyi-inĩ wayo. Rĩu Nuhu akĩmenya atĩ maĩ nĩmaahwĩte. O rĩngĩ Nuhu akĩrekereria ndutura ihinda rĩa gatatũ, no ihinda rĩrĩ ĩkĩona handũ homũ ha gũikara.

Na rĩu Ngai akĩarĩria Nuhu. Akĩmwĩra: ‘Uma thabina. Oya famĩlĩ yaku yothe na nyamũ iria wĩ nacio.’ Maakoretwo thĩinĩ wa thabina makĩria ya mwaka ũmwe. Ta nĩtwĩcirie-i ũrĩa othe maakenete kwĩyona nja rĩngĩ me muoyo!