OVANHU ovo va fyaala pondje inava ya mongulu yomomeva ova twikila ashike nonghalamwenyo yavo ngaashi shito. Kava li va itavela natango kutya Eyelu otali ke uya shili. Ove na okukala va li tava yolo neenghono eshi Noa noukwaneumbo waye va ya mongulu yomomeva. Ndelenee okuyola kwavo okwa ka xulifwa po diva.

Ofimbo ovakolokoshi ovo va li ve lipyakidila nokulonga oilonga yavo, ohaluka odula oya hovela okuloka. Oya li tai loko omupoolela ngaashi omunhu ta tileshi omeva okudja mevela. Noa okwa li a popya oshili. Ndelenee kapa li vali omunhu ta dulu okuya mongulu yomomeva, molwaashi Jehova okwa hangwa nale a idila omuvelo wongulu oyo.

Diva omeva odula okwa li a tuvika edu alishe. Omeva okwa li a hapupula nokwa li taa kunguluka ngaashi omilonga dinene. Okwa fudula mo omiti nokwaalangatifa omamanya. Omeva okwa li taa popoma mokule. Ovanhu ova li va tila neenghono. Ova li va londa koikulundudu nokeemhunda. Kava li tuu tave lipe oushima kutya ngeno ova pwilikinine kuNoa! Ngeno ova pwilikinine, ngeno navo ova hangwa va ya mongulu yomomeva fimbo omuvelo inau idilwa. Ashike kapa li vali omhito yokuya mo.

Omeva okwa enda taa hapupala neenghono. Odula oya li ya loka oule womafiku 40, omutenya noufiku. Omeva okwa li a tumba pombada fiyo a tuvika eemhunda adishe nokuli naado diledile. Ngaashi Kalunga a li a popya, ovanhu aveshe noinamwenyo oyo ya li pondje oya fya omeva. Ovanhu noinamwenyo oyo ya li mongulu yomomeva oyo aike ya xupa po.

Noa novanamati vaye ova li va longa oshilonga sha fimana eshi va tunga ongulu yomomeva. Ongulu oyo oya kala ya kaama kombada yomeva eshi omeva a tumbalala pombada. Odula oya ka sheka konima yefimbo, netango ola li tali minikile. Noa noukwaneumbo waye kava li tuu va kumwa eshi va tala pondje! Edu alishe ola li koshi yomeva. Omeva okwa li ngaashi efuta linenenene. Kava li ve wete sha vali shimwe sha kaama kombada yomeva, kakele ashike kongulu yomomeva.

Ovatongolume ova li va fila momeva. Kava li tava dulu vali okuhepeka ovanhu. Ovatongolume aveshe, nooina nosho yo ovakolokoshi aveshe ova hanaunwa po. Ndele mbela oshike sha li sha ningilwa ooxe yovatongolume?

Ooxe yovatongolume kava li ovanhu ngaashi fye. Ova li ovaengeli ovo va dile meulu ndele tave liningile omalutu opanhu opo va kale kombada yedu. Onghee hano, eshi Eyelu le uya, ovaengeli ovo inava fya pamwe novanhu aveshe. Ova fiya po omalutu opanhu ndele tava shuna meulu. Ndelenee Kalunga ka li e va pitika vali va kale oshitukulwa shoukwaneumbo waye womeulu wovaengeli. Onghee hano, ova ninga ovaengeli vaSatana. Ovaengeli ovo ova ifanwa mOmbibeli kutya eendemoni.

Kalunga okwa pepifa omhepo kombada yomeva, nomeva eyelu okwa hovela okwooholoka. Konima yeemwedi nhano, ongulu yomomeva oya ka kanghama koxulo yomhunda. Eshi pa pita oule womafiku mahapu, ovanhu ovo ve li mongulu oyo ova li ve wete eexulo deemhunda da uluka ko. Omeva okwa twikila okwooholoka.

Noa okwa pitifa mo okadila kalaula mongulu yomomeva haka ifanwa ekola. Ekola ola kala tali telaana kombada yomeva fiyo la alukila mongulu yomomeva, molwaashi kala li la mona onhele iwa apa tali wile. Ekola ola kala tali telaana nokwaalukila kongulu yomomeva lwoikando, opo li fude po.

Noa okwa li a hala okumona ngeenge omeva okwa pwiinina filufilu. Onghee hano, okwa pitifa mo vali onghuti. Ndele onghuti nayo oya aluka, molwaashi kaya li i na apa tai nambele. Noa okwa pitifa mo vali onghuti oshikando oshitivali. Oshikando osho, oya aluka i na efo lomuti wolumono komulungu. Kungaho, Noa okwa li a mona kutya omeva okwa pwiinina. Okwe i pitifa mo vali oshikando oshititatu, opo nee oya ka mona onhele iwa nokukala.

Konima yaasho, Kalunga okwa lombwela Noa a ti: ‘Djeni mo mongulu yomomeva, ove noukwaneumbo woye nosho yo oinamwenyo.’ Mongulu yomomeva ova li va kala mo oule wodula nasha. Onghee hano, osha yela kutya ova li va hafa neenghono eshi va xupa mEyelu naashi va dja mo mongulu yomomeva.