BHU KANGA dia álaka, athu a tambuile konda ia muenhu uâ. Ene ka xikanene kuila o Dilúvio dia-nda kuíza. Ene akexile mu kuelela dingi kiavulu. Maji ene a phalala kuelela.

Mukonda o menha a mateka ku lauka. A lauka ku diulu kála dibanda. Noué ua lungil’ê! Maji athu ka tenene dingi ku bokona mu álaka. Jihova ua jikile kiá o dibhitu.

Kienhiki, o ixi iezalele ni menha. O menha a bhiluka jingiji jonene. A buika mixi ionene ni a kundumuna matadi onene, ni a bhange jibuia javulu. Athu akexile ni uôma. Ene a bande ku milundu. Se, evuile kioso kia ambele Noué ku bokona mu álaka, kioso o dibhitu ki dia jikukile hanji! Maji kindala kiexile kiá tádidi.

O menha akexile mu banda kiavulu. Mu 40 a izuua ni 40 a usuku, kua lauka menha avulu ku diulu. O menha a bande ku milundu, o milundu ioso iezalele ni menha. Kála kia zuelele Nzambi, athu oso ni iama akexile bhu kanga dia álaka afú. Maji oso akexile mu álaka a bhuluka.

Noué ni an’ê a tungile kiambote o álaka. O menha a bande, o álaka ia kexile ku lalama ku thandu a menha. Kizuua kimoxi kuila o nvula ia batuka kiá, o muanha ua mateka ku muika. Kiki kikembu! Mu ixi ioso mua kexile ngó kalunga konene. Kima kimoxi ngó kia kexile mu moneka, o álaka ia kexile ku thandu a menha.

O makixi afú. Ka kexile dingi mu totojola athu. En’oso afú ni mama jâ ni athu a kamúkua aiibha. Maji ihi ia bhitile ni tata jâ?

O jitata ja makixi kexile athu kála etu. Ene exile ji–anju, ejile mu ixi kála athu. Kienhiki, kioso kiéza o Dilúvio en’oso kafú ni akuâ. Ene a xisa o mikutu iâ, ni a vutuka ku diulu kála ji–anju. Maji ka tokalele dingi ku muiji ua ji–anju ja Nzambi. Ene a kituka ji–anju ja Satanaji. O Bibidia i ji xana mademonhu.

Nzambi ua bhusu, o menha a dilúvio, ia a mateka ku sosoloka. Kia bhiti mbeji jitanu, o álaka iemana ku thandu a mulundu. Kua bhitile dingi izuua iavulu, akexile mu álaka a tenene ku tala bhu kanga, ni ku mona ku thandu a milundu. O menha a suluka mu ku sosoloka.

Kienhiki, Noué uehela o njila ia xikelela a ixana kilombe ku tunda mu álaka. Iai ni kunhunga, i ia vutuka, mukonda ka sangele kididi kia kutula. Ia bhange kiki veji javulu, i ia kexile mu vutuka mu álaka.

Noué ua mesenene ku tala se o menha a sosoloka mu ixi, kienhiki ua tumikisa diembe bhu kanga dia álaka. Maji o diembe dia vutuka mukonda ki dia sangele kididi kia ku tula. Noué ua di tumikisa dingi mu veji ia kaiadi, o diembe dia bheka kisasa kia midiva ku muzungu uê. Kienhiki, Noué ua kijidile kuma o menha a sosoloka kiá. Noué ua tumikisa dingi o diembe mu veji ia katatu, mu kusukáko diene dia sange kididi kia ku kala.

Nzambi uambela Noué. Muéne uixi: ‘Tubhuka mu álaka. Katula o muiji uê uoso ni iama.’ Ene akexile mu álaka muvu umoxi ndenge. Tu tena ku xinganeka kiebhi kia sangulukile mu ku kala dingi bhu kanga ni muenhu!