BANTU bashajile pangye ya bwato batwajijile na bwikalo bwabo byonka byo baubilengatu ne kala. Kechi baketekejile amba Muyulo ukeya ne. Kyamweka bakijilemo bingi na kuseka. Bino kechi papichile ne kimye ne, balekele kuseka.

Nobe mu kukopa kwa jiso, mvula watendekele kunoka. Wanokelengatu byonka byo kikala inge mubena kwitulula mema mu kanchinyi. Nowa waambile kine! Bino kafwako nangwa umo wakonsheshe kutwela mu bwato pa kyokya kimye ne. Yehoba ye washinkile kinzhilo.

Kimyetu kicheche kyapichilepo mema akumbene mu binkunenke byonse. Aubiletu nobe mikola ikatampe. Apichilenga mu bichi ne kwalumuna mabwe akatampe, ne kuba kyungwe kikatampe. Bantu bachiine. Bakanjijilenga pa mitumba ikatampe. Nga byo kyakonsheshepo kuwama inge baji baumvwijile Nowa ne kutwela mu bwato kinzhilo saka kyakishinkuka! Pano bunga bwapwijile pa mpuki.

Mema atwajijile na kuvujilako. Mvula wanokele mute ne bufuku pa moba 40. Mema avujile bingi kya kuba mitumba yalepeshe yonse yalobele. Byonkatu byaambile Lesa, bantu bonse ne banyama bajinga pangye ya bwato bafwile. Bino bonse bajinga mu bwato bapulukile.

Nowa ne baana banji ba balume baubile bingi bulongo kufiika bwato. Mema aselwile bwato, ke buye ne na kuselauka peulu. Kepo juba jimo, panyuma ya kuba mvula waleka kunoka, juba jasamine. Byo kyajingapo kya kukumya! Mema akumbenetu konse konse. Kabiji kintutu kyamwekelenga ke bwato bwaselaukilenga peulu ya mema.

Babiyangala bafwile. Kechi bakonsheshe kumanyika bantu jibiji ne. Bonse bafwile, pamo na bainabo ne bantutu bakwabo batamine. Pano ki ka kyamwekele kwi bashabo?

Bashabo bano babiyangala kechi bajinga bantu byonka byo tuji atweba ne. Bajinga bamalaika baishile na kwikala nobe bantu panopantanda. Onkao mambo, Muyulo byo aishile, kechi bafwile byonka byafwile bantu bakwabo ne. Balekele kwingijisha mibiji ya bumuntu yo bavwajile, ne kubwela mwiulu na kwikala jibiji ke bamalaika. Bino kechi bebalekele kwikala lubaji lwa kisemi kya bamalaika ba Lesa ne. Onkao mambo baikele ke bamalaika ba kwa Satana. Mu Baibolo batelwa’mba bandemona.

Kepo Lesa alengejile mwela kupupa, kabiji muyulo wa mema watendekele kuma. Byo papichile bañondo batanu bwato bwashikamine peulu ya mutumba. Papichile moba avula bingi, kabiji aba bajinga mu bwato bakonsheshe kutala pangye ne kumona peulu ya mitumba. Mema atwajijiletu na kunyeka.

Kepo Nowa atumine kañonyi kafiita katelwa’mba kikwangala. Katumbukile kaya na kuzhokoloka ne kubwelakanya, mambo kakankelwe kumona pawama kwikala. Katwajijiletu na kuba inge kaya ne kubwela kabwela na kwikala pa bwato.

Nowa wakebele kumona inge mema auma pa ntanda, kepo atumine nkunda kuya pangye ya bwato. Pakuba nkunda naye wabwelakenye mambo kechi wamwene pa kwikala ne. Nowa watumine nkunda ja bubiji, kabiji nkunda wabwelele sa asenda ku muvumbo wanji jibula ja olivi. Nowa po po ayukile’mba mema auma kala. Nowa watumine nkunda ja busatu, kabiji nkunda wataine pa ntanda pauma pa kwikala.

Lesa pano waambile kwi Nowa. Waambile’mba: ‘Pano ulupuke mu bwato. Obewa mwine ne mukazhobe ne banyama pamo.’ Baikele mu bwato kukila pa mwaka umo. Twakonsha kufwanyikizha byo basangalele bonse pa kubwela jibiji pangye ne kwikala na bumi!