DI PIPUL dɛn we nɔ go insay di ak bin stil de du bad. Dɛn nɔ bin stil biliv se di Ebi Ren go kam. Dɛn go mɔs dɔn de laf Noa ɛn in famili naw pas aw dɛn bin de laf dɛn fɔs. Bɔt i nɔ tu te, sɔntin apin we mek dɛn lɛf fɔ laf.

Di ren bigin kam ebi ebi wan. I bin de kam lɛk we yu tek bɔkɛt de tɔn wata. Na tru Noa bin de tɔk! Bɔt nɔbɔdi nɔ go ebul go insay di ak naw bikɔs Jiova bin dɔn lɔk di domɔt.

Di wata kɔba di grɔn kwik kwik wan. Di wata bɔku lɛk dɛn big riva. I bin de ib dɛn tik ɛn de rol dɛn big big ston, ɛn de mek bɔku nɔys. Di pipul dɛn fred. Dɛn klem ɔp dɛn ay ay ples dɛn. Oya, dɛn bin jɔs de se if dɛn bin no, dɛn bin fɔ dɔn lisin to Noa, ɛn go insay di ak we di domɔt bin opin! Bɔt naw dɛn nɔ go ebul go insay di ak igen.

Di wata bin jɔs de bɔku. Di ren kam ebi wan fɔ 40 dez ɛn 40 nɛt. Di wata bigin kɔba dɛn smɔl smɔl mawnten dɛn te i kɔba dɛn ay ay mawnten dɛn. So ɔl di pipul dɛn ɛn di animal dɛn we nɔ bin de insay di ak day, jɔs lɛk aw Gɔd bin dɔn tɔk. Bɔt natin nɔ bin du di wan dɛn we de insay di ak.

Noa ɛn in pikin dɛn du gud wok we dɛn bil di ak. Di wata mek di ak go ɔp. Wan de, we di ren dɔn kɔt, di san bigin shayn. Na wata nɔmɔ bin de ɔlsay. Ɛn na di ak nɔmɔ bin de pantap di wata.

Di jayant dɛn nɔ bin de igen fɔ du bad to mɔtalman. Dɛn ɔl dɔn day. Dɛn mama dɛn ɛn di ɔda bad pipul dɛnsɛf dɔn day. Bɔt wetin bin apin to dɛn papa dɛn?

Di jayant dɛn papa dɛn nɔto tru tru mɔtalman dɛn lɛk wi. Dɛn na enjɛl dɛn we kam na di wɔl fɔ liv lɛk mɔtalman. So we di Ebi Ren kam, dɛn nɔ day wit di ɔda pipul dɛn. Dɛn chenj dɛn mɔtalman bɔdi ɛn tɔn enjɛl, ɛn go bak na ɛvin. Bɔt Gɔd nɔ gri fɔ lɛ dɛn bi in enjɛl dɛn igen. So dɛn bi Setan in enjɛl dɛn. Di Baybul kɔl dɛn dɛbul.

Gɔd mek briz blo, ɛn di wata bigin fɔ dray. Afta fayv mɔnt, di wata kɛr di ak pantap wan mawnten. We i te smɔl, di pipul dɛn insay di ak luk na do, ɛn dɛn si pantap dɛn mawnten. Di wata bin stil de dray smɔl smɔl.

Noa sɛn wan blak bɔd na do. Di bɔd bin de go flay fɔ sɔm tɛm ɛn kam bak, bikɔs i nɔ bin de si fayn say fɔ tinap. Na so i bin de du, ɛn ɛnitɛm we i kam bak, i kin tinap pantap di ak.

Noa bin want no if di wata dɔn dray, so i sɛn wan ɔda bɔd na do. Dɛn kɔl dis bɔd ya dɔv. Dis bɔd insɛf kam bak bikɔs i nɔ si say fɔ tinap. So dis mek Noa sɛn am bak, bɔt naw i kam wit sɔntin na in mɔt. I kam wit wan lif we i pul na wan ɔliv tik. So dis mek Noa no se di wata dɔn go dɔŋ. Noa sɛn dis sem bɔd di tɔd tɛm, bɔt i nɔ kam bak igen bikɔs i fɛn say we dray fɔ de.

Gɔd tɛl Noa naw se: ‘Kɔmɔt insay di ak. We yu de go na do, go wit yu famili ɛn di animal dɛn.’ Dɛn bin dɔn de insay di ak pas wan ia. Dɛn ɔl bin gladi fɔ kam bak na do, ɛn dɛn bin gladi we dɛn stil gɛt layf!