WANTU bakwamanana yo mavangu mau kuna mbazi a nzaza. Yamu wau ke bakwikidi ko vo e Kizalu kikwiza. Bawokesa tusevo, kansi, ke kolo ko beyambul’o seva.

Kuna kinsalukisa, matonsi mayantikidi bwa tuka kun’ezulu. O Noa olungidi kwandi. Kansi, e ntangwa yakiviokela kwa konso muntu mu kota muna nzaza. Yave wazika e kielo.

Ke kolo ko ntoto wawonso uzele yo maza. Makitukidi nze nzadi ampwena. Mabwisa nti yo kindula matadi mampwena, mazu mayingi masia. Wantu bamwene wonga. Batinini muna miongo mia nda. Ekwe, kala vo bawila Noa yo kota muna nzaza ekolo kielo kiakala kiaziuka! Kansi, owau e ntangwa isakidi.

O maza masakidi wokela. E mvula inokene mini makumaya yo mafuku makumaya. O maza matombokele vana miongo, ye miongo mianda nkutu milangilu yo maza. Ozevo, wantu awonso ye bulu kuna mbazi a nzaza bafwa, nze una kavova o Nzambi. Kansi, awonso bakala muna nzaza bavuluka.

O Noa ye nzo andi salu kiambote basala wau batunga e nzaza. Maza mazangwidi e nzaza, yele akukula vana ntandu a maza. Vava mvula yamanisa o noka, mwini ubayidi. Nkia mpil’esivi! Mwawonso mwakituka se mbu ampwena. Nzaza kaka yamonekanga, yayangama vana ntandu a maza.

Andangula bavididi. Ke bemwesa diaka wantu mpasi ko. Yau awonso bafwidi kumosi ye ngudi zau ye wantu akaka ambi. Kansi, adieyi diabwila mase mau?

Mase m’andangula ke wantu nze yeto ko. Mbasi z’ezulu bakala, bayiza zingila nze wantu ova ntoto. Ozevo, ke bafwa kumosi ye wantu akaka ambi ko vava kiayiza Kizalu. Basisa nitu za wantu yo vutuka kun’ezulu nze mbasi. Kansi, ke bayambulwa ko bayikana diaka ye mbasi za Nzambi. Bakitukidi se mbasi za Satana. Muna Nkand’a Nzambi beyikilwanga vo nkwiya.

Nzambi ovevomwene tembwa. Maza ma kizalu mayantikidi o kuluka. Vioka ngonde tanu e nzaza ivwende van’ebata dia mongo. Vioka lumbu, awana bakala muna nzaza batalanga kuna mbazi yo mona mabata ma miongo. O maza makulukang’aka.

O Noa ovaikisi ngono muna nzaza. Wele atilumukanga, kansi kasolwele fulu kia vundila ko. Watilumukanga tuk’oku yakuna nkumbu miayingi, kansi, wavutukang’aka muna nzaza.

Noa ozolele zaya kana vo maza mayumini ova ntoto. Ovaikisi eyembe muna nzaza. Oyandi mpe ovutukidi kadi kasolwele evundilu ko. Noa unsindikidi nkumbu ezole, e yembe wizidi kota muna kena yo lukaya lua olive muna zozo. O Noa i nzaya kazaya wo vo o maza makulukidi. Osindikidi diaka yembe nkumbu atatu, osolwele fulu kiayuma kasidi vutuka ko.

O Nzambi ovovese Noa vo: ‘Vaika mu nzaza, ye nzo aku yawonso ye bulu.’ Vioka mvu amvimba bakala muna nzaza. Tulenda yindula e mpila kiese bamona mu sala yo moyo yo vaika diaka kumbazi?