POSONDE ya bwato, abantu balitwalilile ukucita ifi balukucita ne kale mu bwikasi bwabo. Tabacetekelepo ati Ubulobe bwa menda bungesa. Cipale balisekele ukucila ne fibalukuseka ku mpindi ya kunuma. Pa mpindi iinini balilekele ukuseka.

Ukwakubulo’kucetekela imfula kaitatikako’kuloka. Yalukuloka ukufuma kwiulu koti nififilya kani ulukwitila amenda ukufuma mu mbeketi. Noa alukubeba lukoso bwino. Pano caba kucelwa kuuli onse ukwingila mu bwato. Umulyango waliselwe na baYehoba.

Pa mpindi ice lukoso ku mutunta konse kwalibiile. Amenda yaba koti ninika isikulu. Yalukuwisye’miti ne kulukukunkulusya amabwe aakulu, ne kupange’congo icikosele makosa. Abantu balitiinine. Kabanina pa musili uusuntukile. Mama ifi bafwaile ukukutika kuli Noa ne kufwaya ukupatama ubwato ninsi umulyango taungesalwa kuli bo! Pano caba kucelwa kuli bo.

Amenda alukuya lukoso ili esula. Yalilokele ukufuma kwiulu pa tusuba 40 ne masiku 40. Yaliswile ukufika na mu mpelo ya mapili. Pa mpindi iinini ne mapili aatali onse kaebila. Koti nifyenka filya baLesa balabile, abantu bonse ne nama abaali posonde ya bwato balifwile. Abaali mukati tabafwile.

Noa ne bana bakwe abalalume balipyungile umulimo uwelelwe uwa kwibako’bwato. Amenda alicimisye, kabili calukwelela peulu pa menda. Kambi kasuba ili imfula yalekele ukuloka, akasuba kakatatika ukutula. Mama ifi palukuboneka ee! Paali icisiba cimo icikulu ponse lukoso. Kabili icintu cimo lukoso icikulu icalukuboneka bwato ubwalukwelela peulu.

Pano abantu bamakosa basila. Tabaako pano ati balukusomesya abantu. Bonse lukoso bafwa, pamo na banyinabo na bambi imbifi. Pano cindo cacitikile kuli bawisibo?

Bawisibo babalya abantu bamakosa tabaalipo bantunsi koti nifwebo. Baali ni nkalamba isyafumine kwiulu ne kwisa mu kwikala koti bantunsi pa calo. Pano ili Ubulobe bwa menda bwaisile, tabafwilile pamo ne bantu bambi. Balilekele ukufwala imibili ya buntunsi bapangile, ne kubwelela kwiulu koti ni nkalamba. Pano tababasuminisyepo ukuba pa lupwa lwa nkalamba sya baLesa. Pano baalibele ni nkalamba syakwe Satana. Mu Baibolo balabeta ati fibanda.

BaLesa baliletele cipuupu, ne menda abulobe alitatikile ukusila. Pakupite’myensi isanu ubwato kabupatama peulu lya lupili. Insiku isingi syalipitile, ne baali mu bwato balilengele ne kubona peulu lya mapili. Amenda alukuye’li asila.

Noa katume’cuni icifitile icibeta ati cikwangala ukufumina posonde ya bwato. Calukupalala lukoso panini ne kubwela, nipakuti tacalukusanganapo apakwikala. Calukucita fyenke’fi kabili impindi yonse calukubwela, calukwikala pa bwato.

Noa alukufwaya ukwisiba kani amenda asila pa calo. Pano ulwakonkelepo alitumine inkulimba posonde ya bwato. Nayo inkulimba yalibwelele pakuti tayasangile apakutusisya ulukasa lwaiko. Noa kaituma libili, lomba yalibwelele na mu mulomo waiko mwali ibula lya lyolife. Noa alisibile ati amenda alicepele pa calo. Noa alitumine inkulimba ulwa butatu, kabili yalisangile apomine apakwikala.

BaLesa kabalabila nakuli Noa ati: ‘Fumamo mu bwato. Pinta ne lupwa lobe ne finama.’ Baali mu bwato ukucila pa mwaka umo. Kansi tungalanguluka ifi bonse basangalele ili bafumine posonde nakabili ninsi balabi!

Ifyakutaŋga 7:10-24; 8:1-17; 1 Petilo 3:19, 20.