Chihande 10

Livaji Lyalinene

VATU vapwile haweluka wawato, vatwalileho lika nakutwama nge mwamakumbi osena. Kavetavile nge Livaji nalikezako. Vatela vasehelenga chikuma kuhambakana makumbi akunyima. Jino hahichile kapyapya kakandende kaha miselo yavo yakumine ngwanju.

Kukasumuka vula yinaputuka kunoka. Meya ahingunukile kufuma mwilu ngana muze tweji kuhingununanga meya amusuhwa. Kumana Nowa ahanjikile mwakwoloka! Oloze kachahashiwile nawa kuli mutu kwingila muwatoko. Chijilo valingile chakusoka chikuma kuli Yehova.

Nakushimbula pimbi hamavu hosena hazalile meya to. Meya apwile jino nge tulwiji vavanene. Meya achangwile mitondo nakushindumuna malolwa amanene, kaha anehelenga shindo. Vatu vaputukile kulichikimina. Vanyinyine hamilundu. Mamayami, ngwavo kachi vamwivwililile tuhu Nowa nakwingila muwato shimbu muchikolo mwapwile mwawashi! Oloze chaluvinda vakotokelele.

Meya atwalileho lika nakuzavuka. Vula yanokele makumbi 40, naufuku namusana. Aputukile kunyina kujisali jajipili, kutwala muze najipili jajisuku chikuma josena jajiminyinyine. Ngana muze vene ahanjikile Kalunga, vatu natunyama vapwile haweluka wawato vafwile. Oloze vosena vaze vapwile mukachi vayovokele.

Nowa navana venyi valingile kanawa hakutunga wato. Meya azundwile wato, kaha wafungwokele helu lyameya. Jino likumbi limwe, omu vula yechele kunoka, musana waputukile kumunyika. Hakutala haweluka kwijiva vyakuvyaku! Kwapwile kalungalwiji wamunene umwe kaha afwikile kumavu kwosena. Chuma chasolokelenga kaha shina wato uze wapwile nakufungwoka helu lyameya.

Vaze vikishikishi vosena hinye-e. Vatu kavayanjilenga chekako mwomwo vaze vikishikishi vosena vanongele. Vosena vafwililile hamwe namanevo navatu vavapi vosena. Nyi chuma chika chasolokele kuli masevo?

Masevo javaze vikishikishi kavapwile vatu nge yetuko. Vapwile vangelo vaze vejile nakutwama hano hamavu ngana mwayetu vatu. Shikaho omu lyejile Livaji, kavafwilile hamwe navatu vosenako. Vazulile mijimba yautu ize valitungilile, nakukinduluka cheka mwilu mwavangelo. Oloze kavavetavilile kupwa nawa mutanga yavangelo jaKalungako. Shikaho vapwile jino vangelo jaSatana. MuMbimbiliya vangelo kana vavavuluka ngwavo vandemone.

Kalunga ahuhwishile peho, kaha meya ahohonyokele. Hakukuma chatukweji vatanu wato watwamine helu lyapili. Makumbi amavulu ahwile, kaha vatu vapwile mukachi kawato vatalile jino haweluka nakumona jisongo jajipili. Meya apwilenga lika nakunyekumuka.

Jino Nowa alowele kajila ulava vavuluka ngwavo likololo. Kajila kanou ayile hashimbu yayindende nakuhiluka cheka, mwomwo kawanyine kwakuwilako. Alingile ngocho hamakumbi amavulu kaha shimbu hishimbu akindulukile, apwilenga nakuwila hawato.

Nowa asakile ejive nge hamavu meya anomu, shikaho atumine nawa katela kufuma muwato. Oloze katela nawa akindulukile mwomwo kawanyine kwakuwilako. Nowa amutumine cheka kamuchivali, kaha amunehelele jino lifwo lyamulive kumuvumbo wenyi. Ngocho Nowa atachikijile ngwenyi meya ananyekumuka lyehi hamavu. Nowa amulowele katela kamuchitatu, kahomu ayile awanyine chihela chaumu chakutwama.

Kalunga jino himwahanjika kuli Nowa. Amwambile ngwenyi: ‘Lovola muwato, tanga yove hamwe kaha natunyama.’ Muwato vatwaminemo tando yakuhambakana kafwe hamwaka wamuundu. Shikaho tunahase kushinganyeka hakuwaha kana vevwile vosena hakulovoka haweluka nakupwa vavatonyi!

Kuputuka 7:10-24; 8:1-17; WaPetulu 1, 3:19, 20.