MPANJI 10

Dibaji Deneni

HANJI yawatu, antu atwalekelihu nachihandilu chawu neyi chochiyelileña dikalu. Ilaña hiyakuhweleleli nawu Dibaji damba kenzaku. Atela aseheli nankashi kubadika mafuku ejima. Ilaña mukuhita kwampinji yantesha alekeli kuseha.

Neyi mukulabula kwadisu nvula yatachikili kunoka. Yachabumukili kufuma mwiwulu kewili neyi chochuwahuñununaña menji mumungomu. Nowa wahosheli mwalala! Ilaña kwadiña hikulaba kwakweni kudana ashelihu hakwila nawu eñili muwatu. Yehova washinkishili kwipitu.

Mukapinji kantesha hohu iseki dejima denzeli. Menji amwekeneña neyi tuloña twamaneni. Menji achañwili nyitondu nikukumpula malola amaneni nakukaka lushindu lweneni chikupu. Antu atiyili  woma. Akandamini hayinañamu yasweja kuzandama. Yayo-o, atoñeli nawu kachi atiyilili mwizu daNowa nakwiñila muwatu henohu ipitu dichidi dayenzunukila! Ilaña kwadiñi hikulaba kwakweni.

Menji asweja nikusweja kwinzala. Nvula yachabumukili kufuma mwiwulu hamafuku 40 nimwana niwufuku. Menji enzeli nimunsa yampidi, chakubula kuhita nimpinji jimpidi jajilehi jajimininini. Neyi chochahosheliyi Nzambi, antu ejima nianyama adiñi hanji yawatu afwili. Ilaña ejima adiñi mukachi kawatu ahandili.

Nowa nianyanindi awamayala akoñeli mudimu wawuwahi hakutuña watu. Menji anyamwini watu, niwatu watachikili kulela hewulu damenji. Chalondelelihu ifuku dimu, hanyima yakwila nvula yinaketuki dehi, itañwa datachikili kutoñeka. Oyuma chiyamwekeni! Kwadiñi hohu kaluñalwiji wumu weneni mwejima. Nawa chuma chamwekeneña hohu chadiñi yowu watu wadiña nakulela hewulu.

Antu asweja kutaluka ajilumukili. Hiyamwekeni cheñi kulonda akatisheña antuku. Wejima wawu afwili, hamu nawamama jawu niantu ejima atama. Hanu dinu chumanyi chayimwekeneni atata jawu?

Atata janawa antu asweja kutaluka hiyadiñi antu adi neyi etuku. Adiñi añelu ana enjili nakushakama hanu hamaseki neyi antu. Dichi chelili Dibaji dinzi, hiyafwilili hamu nawantu ejimaku. Alekeli kuzatisha nyijimba yawuntu yiyadibalumwini awenawu, nakufunta cheñi mwiwulu neyi añelu. Ilaña hiyayitejeli kwikala muchisaka chawañelu jaNzambiku. Dichi ekalili añelu jaSatana. MuBayibolu ayitenaña nawu ademoni.

Nzambi henaha wakunkishili mpepela, nimenji adibaji atachikili kunyekumuka. Hanyima yatukweji tutanu, watu washakamini hewulu dampidi. Mafuku amavulu ahitilihu, nawa antu adiñi mukachi kawatu atwesheli kusumbila hanji nakumona hewulu jampidi. Menji atwalekelihu kunyekumuka.

Nowa watemesheli kajila keyila, kejina daikololu kufuma muwatu. Katuukileña hohu kampinji kantesha kafunta cheñi, muloña hikaweni iluña dadiwahi dakuwilahuku. Katwalekelihu nakwila mwenimu, mpinji yejima yikafuntileña katutamineña hawatu.

Nowa wakeñeleña kwiluka neyi menji anomi dehi heseki, chalondelelihu watuukishili katela kufuma muwatu. Ilaña katela nikena kafuntili muloña hikaweni hakutuntamaku. Nowa wakitemesheli kamuchiyedi, dihu kaleteli ifu damuolive kumuvumbu waku. Dichi Nowa welukili nindi menji ananyekumuka dehi. Nowa watuukishili katela kapampa kamuchisatu, nkumininaku kaweni iluña doma dakushakamahu.

Hohenohu Nzambi wahosheli naNowa. Wahosheli nindi: ‘Fumaku muwatu. Idikaku nichisaka cheyi chejima nianyama hamu.’ Adiña mukachi kawatu kubadika hachaaka chamukuma. Dichi tutoñojoki owu muzañalu wuyatiyiliwu ejima wawu hakwidika hanji cheñi nawa saña ekalila amomi!

Kutachika 7:10-24; 8:1-17; 1 Petulu 3:19, 20.