LAWNG pawnah chuan, mipuite chu an awm pangngaiin an awm a. Tuilet a thleng ang tih an la awih chuang lo. A hma aiin an nui nasa zawk mah mai thei. Mahse an nuih a tawp thuai ta.

Tui a lo tla tan ta thut a. Baltin atanga tui i leihbuak ang mai hian van atangin a rawn bua a. Nova a lo dik e. Mahse tu tan pawh lawnga luh nan a tlai lutuk ta. Jehovan kawngka a khar nghet tlat tawh si a.

Lei hniam lai zawng zawng a chim thuai a. Tui chu luipui lian pui ang mai hi a lo ni a. Thingte a len thlu a, Jung lian pui puite a len a, a ri hum hum mai a. Mite chuan an hlau va. Lei hmun sang zawk laiah an lawn a. Aw Nova thusawi lo ngaithlain, an tan kawngka a inhawn lai khan lawngah lo lut ve se an va duh em! Mahse tunah chuan a tlai lutuk ta.

Tui chu a sang deuh deuh va. Van atangin ni 40 leh zan 40 chhung tui chu a hua a. Tlang pang a chim chho va, tlang sang berte pawh a chim pil ta thuai a. Tichuan Pathian sawi tawh ang ngeiin, lawng pawna mite leh ransa zawng zawng chu an thi ta vek a. A chhunga mi zawng zawng erawh chu an him a.

Nova leh a fapate chuan lawng tuk hna tha an lo thawk ngei mai. Tuiin a chawi kang a, tui chung daihah a lang a. Tin ni khat chu, ruah a ban hnuah ni a eng a. A va hmuhnawm em! Khawi hmunah pawh tuifinriat pakhat lian pui chauh a awm a. Hmuh theih thil awm chhun chu lawng, tui chunga lang chu a ni.

Tunah chuan mihrawlte an bo ta. Mite tina turin an awm ngai tawh lo vang. An thi vek tawh, an nute leh mi tha lo dangte nen. Mahse an pate chungah enge thleng?

Mihrawlho pate chu keini ang mihring tak tak an ni lo va. Leilunga mihring anga chang tura lo chhuk vantirhkohte an ni. Chuvangin tuilet laiin, mipui dangte malin an thi ve lo va. Mihring taksa an insiamte chu an bansan a, vantirhkohte angin vanah an kir leh a. Mahse Pathian vantirhkohte chhungkuaa an tel phal a ni tawh lo. Chuvangin Setana vantirhkohte an ni ta a. Bible-ah chuan ramhuaite vuah an m.

Pathianin thli a tlehtir ta a, tuilet tui chu a kam tan ta a. Thla nga hnuah lawng chu tlang chhipah a innghat ta a. Ni tam tak a rai leh a, lawng chhunga awmte chuan dak chhuakin tlang chhipte an hmu thei ta a. Tui chu a kam ta zel a.

Tichuan Nova chuan cho-ak an tih sava dum chu a chhuahtir a. Fukna tur hmun tha a hmuh dawn loh vangin a thlawk bo lawk ang a, a lo kir leh ang. Hetiang hian a ti zel a, a lo kir apiangin lawngah a fu zel a.

Nova chuan leilung ata tui a kam tawh nge tawh lo tih hriat a duh a, tichuan lawng atangin thuro a thlawh chhuahtir a. Mahse awmna hmun tur a hmuh loh avangin a lo kir ve leh a. Nova chuan vawi hnihna a thlawh chhuahtir leh a, a hmuiin oliv hnah a rawn hawn a. Tichuan Nova chuan tui a kam tawh tih a hre ta a. Nova chuan thuro chu vawi thumna a thlawh chhuahtir leh a, a tawpah chenna tur hmun ro a hmu ta a.

Pathianin Nova hnenah: ‘Lawng ata chhuak tawh la. chhungte leh rante i hnenah hruai rawh,’ a ti a. Lawng chhungah chuan kum khat pumhlum aia rei an awm tawh a. Chuvangin pawna nung dama an han awm leh tur an tana a lawmawm turzia chu kan suangtuah thei ang.