Tanojnots 10

Se Tetsaujkakiouit

TALTIKPAKNEMINIJ tein amo yetoyaj itech arca kisentokayaj ika imin tachiualis. Okachi kisentokayaj kinkejkelouayaj porin ayamo kineltokayaj ox ualaskia Tetsaujkakiouit. Sayoj ika, amo uejkauak uan amook kinkejkelojkej.

Sepasaj peuak kioui. Uetsia at kemej eskia aksa kitoyaujtoskia. ¡Melauj katka tein Noé kijtojka! Sayoj ika amo akin ueliaok mokalakiaya itech arca, porin Jiova Dios ipa kuali tatsakkaya.

Amo uejkauak, achto pexonik ika at kampa tal tamanis. At tamatia kemej uejueyi atauamej. Kiuikaya kuoujmej uan uejueyi tet uan tel taijkoyokaya. Taltikpakneminij momoujtijkej. Tejkokej itech uejueyi tepemej. ¡Semi monemilijkej maj kitajtolkakinij Noé uan maj mokalakianij itech arca keman tatapotoyaok! Sayoj ika amo ueliaok.

Taltikpak kisentokaya pexonia uan pexonia ika at. Omepoual tonal uan omepoual youal kioujtoya. Amo uejkauak, nochin uejueyi tepemej no pachiujkej ika at. Ijkon kemej Dios kijtojka, nochin taltikpakneminij uan tapialmej tein amo yetoyaj itech arca mikkej. Sayoj ika, tein yetoyaj itech arca makiskej.

Noé uan ikoneuan kiyekchijchiujkej arca, yejika amo pankalakik, ta motalij aixko. Satepan, se tonal keman takisak, moixtapoj Tonaltsin. ¡Tel kualtsin motachiaya! Onkaya at noyampa, uan sayoj moitaya arca tein yetoya aixko.

Amo nemiajok nejon takamej tel uejueykej uan tel chikaujkej. Amo sepaok iminka mauiltiskiaj taltikpakneminij. Nochin mikkajya ijkon kemej tenamej uan oksekin taltikpakneminij tein amo yolkualmej. Sayoj ika, ¿toni kinpanok imin tatuan?

Imin tatuan nejon takamej tel uejueykej uan tel chikaujkej, amo katkaj yekmelauj taltikpakneminij kemej tejuan. Ta katkaj ángeles tein ualajkaj nikan Taltikpak uan nemikoj kemej takamej. Yejika, keman ualaj Tetsaujkakiouit, amo mikkej kemej oksekin taltikpakneminij. Kikaujkej imin taltikpaknemilis uan oksepa yajkej iluikak kemej ángeles. Sayoj ika amo kinkaujkejok maj mosentilikan imiuan iángeluan Dios. Mochiujkej iángeluan Satanás. Biblia kintokaytia amokuali ejekamej.

Satepan Dios kichiuak maj taejeka, uan at peuak temoua. Satepan keman panok makuil metsti, arca motsakuilij tepekuapan. Keman panok miak tonalmej, tein yetoyaj itech arca analtachixkej uan kiitakej ika nesiajya seki tepemej imin kuapan. At kisentokaya temouaya uan temouaya.

Satepan Noé kikajkauak se tiltik totot tein yetoya itech arca. Patania uan oksepa mokepaya, porin amo kiajsia kani motalis. Uan nochipa keman kisaya mokepayasaj uan motaliaya itech arca.

Noé kinekia kimatis ox onkayaya tal tein uakik, yejika kikajkauak se uiltsin tein yetoya itech arca. Nejon uiltsin no mokepak, porin amo kiajsik kani motalis. Noé oksepa kikajkauak uiltsin, uan keman mokepak kiualkuik itech itempil ixiujyo se kuouit, ijkon Noé kimatik ika at temokaya. Ika expa, Noé oksepa kikajkauak nejon uiltsin uan ijkuak kiajsik tal uakik kampa nemis.

Satepan Dios kinojnotsak Noé. Kiiluij: ‘Xikisa itech arca iuan mochankauan uan tapialmej’. Panoua se xiuit yetoyaj itech arca. ¡Ximonemili keniuj yolpakkej keman oksepa kiskej uan yoltoyaj!

Génesis 7:10-24; 8:1-17; 1 Pedro 3:19, 20, NM.