TLAPOUALISTLI 10

Se ueyi apachiuilistli

TLALTIKPAKTLAKAMEJ tlen amo okatkaj ijtik akali, ok okichijtokaj tlen amo kuali. Ayamo okineltokayaj kox ualaskia Apachiuilistli. Uelis sapanoa ouetskakej. Maski ijkon, satepan ayakmo ouetskakej.

San niman opejki kiaui. Okiauik chikauak ijkon ken ijkuak kinokiaj miak atl. ¡Opanok ken okijto Noé! Axkan ayakmo akaj ueliskia kalakis ijtik akali. Jehová kuali okitsakuak ikaltlatsakuil akali.

San niman opejki atemi Tlaltikpak. Omochijkej uejueyi aueyatl. Okintopeuaya kuajmej uan okinmoliniaya uejueyi temej uan chikauak omokakia. Tlaltikpaktlakamej omomojtijkej. Otlejkokej ipan tepemej. ¡Melauak kinekiskiaj kikakiliskiaj Noé uan kalakiskiaj ijtik akali ijkuak ok tlapotoka! Axkan ayakmo uelis kalakiskiaj.

Nochi Tlaltikpak oatemik. Ipan 40 tonalmej uan 40 yoak chikauak okiauik. San niman nochtin tepemej ayakmo omoitayaj pampa yokatka miak atl. Ijkon ken toTajtsin Dios okijto, nochtin tlaltikpaktlakamej uan yolkamej tlen amo okalakej ijtik akali, omikej. Maski ijkon, nochtin akinmej okatkaj itech akali omakiskej.

Noé uan ikoneuan kuali okichijchijkej akali. Atl okiajkokui uan okipankixti akali uan okiuikaya. Ijkuakon, se tonal ijkuak ayakmo okiauia, okiski Tonaltsin. ¡Otetlajtlachialtiaya tlen omoitaya! San okatka atl itech nochi Tlaltikpak. Uan san omoitaya akali ixko atl.

Ayakmo okatkaj tlakamej tlen sapanoa uejkapantikej. Ayakmo oksepa nemiskiaj pampa kintlajyouiltiskiaj tlaltikpaktlakamej. Nochtin omikej, innana uan oksekimej tlaltikpaktlakamej amo yolkualmej. Uan intatajuan, ¿tlen okinpanok?

Intatajuan akinmej sapanoa uejkapantikej amo okatkaj tlaltikpaktlakamej ken tejuan. Yejuan okatkaj ángeles tlen oualtemokej uan omochijkej tlaltikpaktlakamej ken tejuan. Ik non, ijkuak ouala Apachiuilistli yejuan amo omikej ken oksekimej tlaltikpaktlakamej. Okikajtejkej innakayo tlen okipiayaj, uan omokuepkej iluikak ken ángeles. Maski ijkon, ayakmo okinkauilijkej ma yetokan ompa iluikak iuan oksekimej iángeles toTajtsin Dios. Omochijkej iángeles Satanás. Biblia kintokayotia amo kuali ejekamej.

Axkan, toTajtsin Dios okichi ma ejeka chikauak, uan atl opejki temoa. Opanok makuili metstli uan akali omokauato ipan se tepetl. Opanokej miakej tonalmej, uan akinmej okatkaj ijtik akali ueli okitakej ikuapan tepemej. Atl otemotoka.

Ijkuakon, Noé okikajka se tototl tliliuik tlen itoka kakalotl. Nin tototl opatlania tepitsin uan oksepa omokuepaya ijtik akali pampa amo okajsia kanin mokauaskia. Ijkon okichijtoka, uan ijkuak oualmokuepaya omotlaliaya ipan akali.

Noé kinekia kitas kox ayakmo okatka atl itech Tlaltikpak, uan ik non, okititlanki se paloma. Uan nin omokuepki pampa amo okajsik kanin mokauas. Noé ojpa okititlanki nin paloma, uan oualmokuepki uan itech itenpil okiualikaya ixijyo olivo. Atl otemok. Noé eyijpa okititlanki paloma, uan nin okajsik tlali uaki kanin omoka.

Axkan, toTajtsin Dios okinotski Noé. Okilui: ‘Xikisa itech akali. Xikinkixti mochanejkauan uan yolkamej’. Opanokej itech akali kanaj se xiuitl. ¡Ximokuayejyeko ken oyolpakej miak ijkuak okiskej uan okitakej ken okinmakixtijkej!

Génesis 7:10-24; 8:1-17; 1 Pedro 3:19, 20.