BATHO bao ba bego ba se ka arekeng ba ile ba tšwela pele ba phela ka tsela e tlwaelegilego. Ba be ba dutše ba sa dumele gore Meetsefula a tla tla. Ba swanetše go ba ba ile ba sega le go feta pele. Eupša go se go ye kae ba ile ba tlogela go sega.

Gateetee meetse a ile a thoma go tšhologa. A ile a tšhologa a etšwa legodimong go swana le ge o tšholla meetse ka paketeng. Noa o be a nepile! Eupša bjale go be go se sa na nako ya gore motho le ge e le ofe a tsene ka arekeng. Jehofa o be o tswaletše mojako.

Go se go ye kae ke ge meetse a šetše a khupeditše lefase ka moka. Meetse ao e ile ya ba a mantši a swana le dinoka tše dikgolo. A ile a tumola dihlare, a kgokološa maswika a magolo gomme a dira modumo o mogolo. Batho ba be ba tšhogile. Ba ile ba namelela ditlhoreng tša dithaba. A kamoo ba bego ba duma ka gona ge nkabe ba ile ba theetša Noa gomme ba tsena ka arekeng ge mojako o be o sa ba bulegetše! Eupša ga bjale nako e be e fedile.

Meetse ao a ile a oketšega kudu. A ile a tšhologa a etšwa legodimong ka matšatši a 40 le mašego a 40. A khupetša dithaba gomme go se go ye kae a khupetša le dithaba tše ditelele kudu. Ka gona go etša ge Modimo a be a boletše, batho ka moka bao ba bego ba se ka arekeng ba ile ba hwa gotee le diphoofolo. Eupša bohle bao ba bego ba le ka gare ga yona ba be ba bolokegile.

Noa le barwa ba gagwe ba be ba dirile modiro o mobotse wa go aga areka. Meetse a ile a e kukela godimo gomme ya phaphamala ka godimo ga wona. Ke moka ka letšatši le lengwe ge pula e khutše, letšatši la thoma go hlaba. A tiragalo e makatšago gakaakang! Meetse a be a aparetše lefase ka moka. Selo feela seo se bego se ka bonwa e be e le areka yeo e bego e phaphametše godimo ga wona.

Ga bjale dinatla tšela di be di se sa le gona. Di be di ka se sa hlwa di tlaiša batho. Di be di hwile ka moka le bommago tšona gotee le batho ka moka ba babe. Eupša go ile gwa direga’ng ka botatago tšona?

Botatago dinatla tšeo e be e se batho bao ba swanago le rena. E be e le barongwa bao ba ilego ba tla mo lefaseng go tlo phela e le batho. Ka gona ge Meetsefula a be a etla, ga se ba ka ba hwa le batho ba bangwe. Ba ile ba apola mebele ya nama yeo ba bego ba ikapešitše yona gomme ba boela legodimong e le barongwa. Eupša ga se ba ka ba hlwa ba dumelelwa go ba karolo ya lapa la barongwa ba Modimo. Ka gona ba ile ba fetoga barongwa ba Sathane. Ka Beibeleng ba bitšwa batemona.

Bjale Modimo o ile a dira gore go tšutle phefo gomme meetse ao a thoma go kokobela. Ka morago ga dikgwedi tše hlano, areka ya ema godimo ga thaba. Gwa feta matšatši a mantši gomme bao ba bego ba le ka arekeng ba be ba kgona go lebelela ka ntle ba bona ditlhora tša dithaba. Meetse ao a ile a tšwela pele a kokobela ganyenyane-ganyenyane.

Ke moka Noa a ntšha ka arekeng nonyana e ntsho yeo e bitšwago legokobu. La fofela ka ntle, le fela le eya le boa ka gobane le be le sa hwetše moo le ka dulago gona. Le ile la dira bjalo gantši gomme nako le nako ge le boa, le be le kotama arekeng.

Noa o be a nyaka go bona ge e ba meetse a pšhele lefaseng, ka gona o ile a ntšha leeba ka arekeng. Eupša leeba leo le lona la boa ka ge le se la hwetša moo le ka dulago gona. Noa o ile a le ntšha ka lekga la bobedi ke moka la boa le momile letlakala la mohlware ka molomo. Ka gona Noa a tseba gore meetse ao a be a kokobetše. Noa a ntšha leeba ka lekga la boraro gomme mafelelong la hwetša lefelo le le omilego moo le ka dulago gona.

Bjale Modimo a bolela le Noa a re: ‘Etšwa ka arekeng. Etšwa le lapa la gago le diphoofolo ka moka.’ Ba be ba bile ka arekeng ka nako e fetago ngwaga. Ka gona re ka nagana kamoo ba bego ba thabile ka gona ge ba tšwetše ka ntle gape gomme ba phela!

Genesi 7:10-24; 8:1-17; 1 Petro 3:19, 20.