Ekitebyo 10

Omwegyemure Rugambwa

AHEERU y’obwato, abantu bakaba bari omu ntuura yaabo ey’obutoosha. Nabwe bakaba batarikwikiriza ngu Omwegyemure nigubaasa kwija. Baine kuba baashekire munonga ekitakabahoga. Kwonka omu kaanya kakye bakarekyera aho kusheka.

Omu kaanya kakye amaizi gakatandika kweshuka. Enjura ekafukunkuka kuruga omu iguru nk’oku waakuba nooshuka amaizi kuruga omu karobo. Noa akaba ahikire! Kwonka hati kikaba kitakibaasikira muntu weena ondiijo kutaaha omu bwato. Yehova akaba yaaherize kukinga orwigi.

Omu kaanya kakye eitaka ryona rikaba ryashwekirwe amaizi. Amaizi gakaba nk’emigyera mihango. Gaakuura emiti kandi gaahigura amabaare mahango, haza gaahoreera munonga. Abantu baatiina munonga. Baatemba aha myanya etunguukire. Ai bambe, ka bayefuurize ahabw’obutahuririza Noa bakataaha omu bwato obu orwigi rwabaire rukiigwire ahabwabo! Kwonka hati kikaba kitakibaasika.

Amaizi gakaguma nigeyongyera ahaiguru. Okumara ebiro 40 nyomushana na nyekiro, amaizi gakaguma nigashandaara kuruga omu iguru. Gayeyongyera ahaiguru gaashweka enshozi, kandi omu kaanya kakye n’enshozi ezirikukirayo oburaingwa zaashwekwa amaizi. Kityo nk’oku Ruhanga yaabaire agambire, abantu boona n’enyamaishwa ez’aheeru y’obwato bikafa. Kwonka buri muntu omu bwato akakira.

Noa n’abatabani bakaba bakozire omurimo murungi okwombeka obwato. Amaizi gakarikiriza, kandi ryazeereerera ahaiguru y’amaizi. Reero eizooba rimwe, bwanyima y’enjura kurekyera aho kugwa, eizooba rikatandika kwaka. Ka haabaire nihareebeka kurungi! Buri hantu hoona hakaba hariho enyanja emwe mpango yonka. Kandi ekintu kyonka ekyabaire nikireebwa bukaba buri obwato burikuzeereerera ahaiguru y’amaizi.

Abantu b’ebikaaka hati bakaba batakiriho. Bakaba batakigaruka kubonabonesa abantu. Boona bakaba baafiire hamwe na baanyinabo hamwe n’abantu abandi boona ababi. Kwonka shi n’enki ekyahikire ahari baishebo?

Baishe b’ebikaaka buzimazima bakaba batari bantu nkaitwe. Bakaba bari baamaraika abaizire kutuura nk’abantu omu nsi. N’ahabw’ekyo omwegyemure ku gwaizire, tibarafiire hamwe n’abantu abandi. Bakarekyera aho kukoresa emibiri y’obuntu ei baabaire bakozire, baagarukayo omu iguru nka baamaraika. Kwonka bakaba batakiikirizibwa kuba ekicweka ky’eka ya Ruhanga eya baamaraika. Nikwo batyo baahinduka baamaraika ba Sitaane. Omu Baibuli nibeetwa baadaimoni.

Ruhanga hati yaareeta omuyaga gwahuuha ensi, amaizi g’omwegyemure gaatandika kutuuba aha nsi. Bwanyima y’emyezi etaano obwato bukahika aha katwetwe k’orushozi. Ebiro ebindi bingi bikahinguraho, kandi ab’omu bwato bakaba babaasa kureeba aheeru bareeba emitwe y’enshozi. Amaizi gakaguma nigatuuba, nigakyendeera.

Bwanyima Noa yaashohoza ekikoona kuruga omu bwato. Kikaba kiguruka kigyenda kumara akaanya kandi bwanyima kigaruka, ahabw’okubura omwanya murungi gw’okuteekamaho. Kikaguma nikikora kityo kandi buri kugaruka kikaba kiteekama aha bwato.

Noa akaba naayenda kumanya yaaba amaizi gaayomire aha nsi, nikwo bwanyima yaashohoza enkombe kuruga omu bwato. Kwonka n’enkombe ekagaruka ahabw’okubura ahi yaateekama. Noa yaagituma ogundi murundi, yaijana n’eibabi ry’omuzeituuni omu kanwa kaayo. Nikwo Noa yaamanya ngu amaizi gaatuubire aha nsi. Noa yaayoheereza enkombe omurundi gwa kashatu, aha muheru enkombe yaabona ah’okutuura.

Ruhanga nikwo kugamba na Noa. Akamugira ati: ‘Shohora orugye omu bwato. Gyenda n’eka yaawe yoona n’enyamaishwa.’ Bakaba batwire omu bwato kumara omwaka n’okurengamu. N’ahabw’ekyo nitubaasa kuteera akashushani amashemererwa agu baabaire baine okugaruka kuza aheeru n’okuba abahuriire!

Okutandika 7:10-24; 8:1-17; 1 Petero 3:19, 20.