MENLI mɔɔ ɛnle ɛlɛne ne anu la hɔle zolɛ bɔle bɛ ɛbɛla kɛmɔ ɛnee ɔde ala la. Bɛanlie bɛanli kɛ Azuyilɛ ne bara. Ɔbayɛ kɛ bɛzelele kpole bɛdɛlale alumua ne. Noko yeangyɛ biala bɛgyakyile ɛzelekɛ ne.

Arɛlevilɛ nu ala ezule ne bɔle ɔ bo kɛ ɔtɔ. Ɔvi anwuma ɔwolale kɛ asɛɛ bɛlɛwola nzule bɛavi bokiti nu la. Nowa edwɛkɛ ne ɛyɛ nɔhalɛ! Noko ɛnee yeha amozi somaa kɛ awie bieko kɛhɔ ɛlɛne ne anu. Ɛnee Gyihova ɛdo anlenkɛ ne anu kyengyekyengye.

Yeangyɛ biala azule ne vale azɛlɛ ne azo amuala. Nzule ne yɛle azɛlɛ ne anye faanwo kɛ azule mgbole la. Ɔzuhunle mbaka ɔguale na ɔhundole awolɛ mgbole, na ɔyɛle dede dɔɔnwo. Menli ne zulole. Bɛfofole awoka ndendenle. Oo, nea kɛ bɛ kunlu a anrɛɛ bɛdiele Nowa na bɛhɔle ɛlɛne ne anu wɔ mekɛ mɔɔ ɛnee bɛtɛtole anlenkɛ ne anu la ɛ! Noko ɛnee yeha amozi somaa.

Azule ne hɔle zolɛ yile hɔle anwuma. Ezule dɔle vile anwuma nɔɔzo nee ewiazo kenle 40. Ɔvole awoka ne mɔ azo, na akee ɔhedale awoka ndendenle ne mɔ bɔbɔ azo. Yemɔti kɛmɔ ɛnee Nyamenle ɛha la, menli nee nane mɔɔ ɛnle ɛlɛne ne anu la kɔsɔɔti wule. Noko awie biala mɔɔ wɔ nuhua la nyianle ngoane.

Nowa nee ɔ mra mrenya ne mɔ yɛle gyima kpalɛ kɛ bɛbobɔle ɛlɛne ne la. Nzule ne manle ɛlɛne ne zo, na ɔtulule nzule ne anye. Na kenle ko, mɔɔ ɛnee ezule ne ɛgyakyi ɛdɔlɛ la, sɛnzɛne ne bɔle ɔ bo kɛ ɔfi. Nea kɛnlɛma mɔɔ ɛnee ɔde a! Ɛnee azule faanwo ko ala a la ɛkɛ a. Na debie ko pɛ mɔɔ ɛnee bɛnwu ye la a le ɛlɛne ne mɔɔ ɛtulu ɔ nye la.

Kakanyinlima ne mɔ ɛnle ɛkɛ bieko. Bɛnle ɛkɛ bieko na bɛasisi menli. Bɛ muala bɛwu, bɛ nee bɛ nli mɔ yɛɛ ɛtanevolɛma mɔɔ ɛha la. Na duzu a dole bɛ ze mɔ a?

Kakanyinlima ne mɔ bɛ ze mɔ ɛnle menli kɛ yɛdayɛ la. Bɛle anwumabɔvolɛma mɔɔ rale azɛlɛ ye azo radɛnlanle aze kɛ menli a. Yemɔti mekɛ mɔɔ Azuyilɛ ne rale la, bɛanwu kɛ menli mɔɔ ɛha la. Bɛanva bɛ sonla nwonane ne bɛanli gyima bieko, na bɛziale bɛhɔle anwuma kɛ anwumabɔvolɛma. Noko bɛammaa bɛ adenle bɛammaa bɛamboka Nyamenle anwumabɔvolɛ abusua ne anwo bieko. Ɔti bɛrayɛle Seetan anwumabɔvolɛma. Wɔ Baebolo ne anu bɛfɛlɛ bɛ sunsum evinli.

Akee Nyamenle manle anwoma bie dule, na azule ne bɔle ɔ bo kɛ ɔsesa. Wɔ siane nnu anzi ɛlɛne ne ranwenle boka bie azo. Mekɛ dɔɔnwo zenle hɔle, na ɛnee akee menli mɔɔ wɔ ɛlɛne ne anu la kola nea alie nwo na bɛnwu awoka ne mɔ ati zo. Nzule ne hɔle zolɛ hwenle.

Akee Nowa zoanle kɔkɔsɛlɛ manle ɔvile ɛlɛne ne anu ɔvindele. Ɔtu ɔkɔ a, ɔngyɛ ɛnee yezia yera, ɔluakɛ ɛnee ɔnyia ɛleka kpalɛ ɔndɛnla. Ɔhɔle zolɛ ɔyɛle ɛhye na mekɛ ko biala ɔziale ɔrale, na ɛnee ɔbatɛnla ɛlɛne ne azo.

Ɛnee Nowa kpondɛ kɛ ɔnwu kɛ nzule ne ɛwie sesa bɔkɔɔ wɔ azɛlɛ ne azo, yemɔti ɔzoanle abubule ɔdaye noko ɔvile ɛlɛne ne anu. Abubule ne noko ziale rale ɔluakɛ yeanyia ɛleka yeandɛnla. Nowa zoanle ye mɔɔ tɔ zolɛ nwiɔ la, na ɔvale ɔlivi nya ɔ nloa anu ɔrale. Yemɔti Nowa nwunle kɛ nzule ne ɛsesa. Nowa zoanle abubule ne mɔɔ tɔ zolɛ nsa la, na awieleɛ kolaa ne ɔnyianle azɛlɛ resee zo ɔdɛnlanle.

Akee Nyamenle dendɛle hilele Nowa. Ɔse: ‘Ɛvi ɛlɛne ne anu dwu aze. Ɛ nee wɔ abusua ne amuala yɛɛ nane ne mɔ mɔɔ boka wɔ la.’ Bɛdɛnlanle ɛlɛne ne anu mɔɔ bo ɛvolɛ ko. Yemɔti yɛkola yɛnwu kɛ bɛ nye zile liele kɛ bɛvi ɛlɛne ne anu bɛvinde mɔɔ bɛlɛ ngoane a!