NUꞌU̱ yä jäꞌi himbi yu̱tꞌi ha rä arka, bi sigi ko nuꞌu̱ yä mꞌu̱i mi pe̱ꞌtsi. Himi kamfritho ge ma xä dagi nꞌa rä Däta däyꞌe. Zäi ge mänꞌa xa mi thedetho. Pe hingä yaꞌä, ya himbi nthede.

Nguntꞌä bi mu̱di bi dagi yä dehe. Bi dagi xi ndunthi yä dehe de mähetsꞌi ngu nuꞌmu̱ di ꞌmañähu̱ yä dehe. ¡Mäjuäni näꞌä xki mängä rä Noe! Pe ya hinto bi za bi yu̱tꞌi ha rä arka. Rä Zi Dada Jeoba ya xki gotꞌi xä ñho rä goxthi rä arka.

Nguntꞌä bi ñuxä gatꞌho yä ꞌmatha. Nuꞌu̱ yä dehe bi dagi ꞌñenä mñä däta däthe. Mi entꞌi yä zaa, mi tuxä yä ndo̱do ꞌne xa mi ja yä ngani. Yä jäꞌi xa bi ntsu. Bi bo̱tsꞌe ha yä ndehe yä tꞌo̱ho̱. Huekäteꞌu̱, ¡hängu mi nehmäꞌu̱ xä jamäsu näꞌä bi xipi rä Noe ꞌne xä yu̱tꞌi ha rä arka nuꞌmu̱ mi xogitho rä goxthi! Pe nubye̱ ya himbi za te bi yꞌo̱tꞌe.

Yä dehe bi sigi bi bo̱tsꞌe ꞌne bi bo̱tsꞌe. Po 40 yä pa ꞌne 40 yä xui bi dagi xi ndunthi yä dehe de ha mähetsꞌi. Yä dehe bi bo̱xä ha yä tꞌo̱ho̱ ꞌne nguntꞌä bi goꞌmi gatꞌho nuꞌu̱ yä tꞌo̱ho̱ xa mñä däta. Ja ngu xki mängä rä Zi Dada Jeoba, gatꞌho nuꞌu̱ yä jäꞌi ꞌne nuꞌu̱ yä zuꞌue hixki yu̱tꞌi mbo ha rä arka, bi du. Pe gatꞌho nuꞌu̱ mi o mbo ha rä arka, bi bongi.

Rä Noe ꞌne yä tꞌu̱ xki ja nꞌa rä hogä ꞌme̱fi nuꞌmu̱ bi hyokä rä arka. Yä dehe bi gu̱tsꞌi näꞌä rä arka ꞌne bi ñhatsꞌi mäñä de ha yä dehe. ꞌNepu̱, nꞌa rä pa, bi tsaya rä yꞌee, ꞌne bi bo̱ni rä Hyadi. ¿Te mi nheki? Se̱he̱ mi ja nꞌa rä däta ndehe xki goꞌmi gatꞌho rä Xiꞌmhai. Se̱he̱ mi nheki hanja rä arka mi ñhatsꞌi mäñä de ha yä dehe.

Ya hingä mi njoꞌo nuꞌu̱ yä nda däta jäꞌi. Ya hingä ma xä mengi pa dä me̱fi yä tsꞌo tꞌo̱tꞌe ꞌne ya hingä ma xä u̱ni yä jäꞌi. Gatꞌho nuꞌu̱ yä nda däta jäꞌi ya xki du ko nuꞌu̱ yä nänä ꞌne gatꞌho nuꞌu̱ märꞌa yä bo̱ka jäꞌi. Pe, ¿te bi thogi ko nuꞌu̱ yä nda dada?

Yä dada nuꞌu̱ yä nda däta jäꞌi, hingä xa mäjuäni mñä jäꞌi ngu nuju̱. Nuꞌu̱ mñä e̱nxe̱ xki gäi de ha mähetsꞌi pa ha rä Xiꞌmhai pa dä mꞌu̱i ngu yä jäꞌi. Hänge, mi zo̱ho̱ näꞌä rä Däta däyꞌe, nuꞌu̱ himbi du ja ngu nuꞌu̱ märꞌa yä jäꞌi. Nuꞌu̱ yä e̱nxe̱ bi zopu̱ nuꞌu̱ yä ndoyꞌo de gä jäꞌi mi pe̱ꞌtsi ꞌne bi mengi mänꞌaki ha mähetsꞌi ngu yä e̱nxe̱. Pe Äjuä ya himbi hyopi dä mꞌu̱i ko nuꞌu̱ yä hogä e̱nxe̱. Nuꞌu̱ yä tsꞌo e̱nxe̱ bi zo̱ho̱ bi de̱ni rä Zithu. Hänge ha rä Mäkä Tꞌofo nuyu̱ yä tsꞌo e̱nxe̱ tꞌembi yä u̱xjua.

Nubye̱, Äjuä bi japi bi nja nꞌa rä bu̱nthi, ꞌne nuꞌu̱ yä dehe bi mu̱di bi gäi. Ku̱tꞌa nzänä mꞌe̱fa de nuꞌmu̱ xki dagi näꞌä rä däta däyꞌe, näꞌä rä arka bä hudi ha nꞌa rä tꞌo̱ho̱. Bi thogi ndunthi yä pa, ꞌne nuꞌu̱ yä jäꞌi mi o mbo de rä arka bi za bi hyandi yä ndehe yä tꞌo̱ho̱. Yä dehe bi sigi bi gäi ꞌne bi gäi.

Nubye̱, rä Noe bi hye̱gi dä bo̱ni de rä arka nꞌa rä ꞌmo tsꞌintsꞌu̱ rä thuhu kaa. Nunä tsꞌintsꞌu̱ bi ñhatsꞌi pe nguntꞌä mi pengi ngeꞌä himi tini nꞌa rä luga habu̱ dä no̱ge. Mi sigi mi po̱ni, pe mi pengi pa dä no̱ge ha rä arka.

Rä Noe mi ne dä hyandi mu̱ nuꞌu̱ yä dehe ya xki xaa, hänge mꞌe̱fa, bi me̱hni nꞌa rä palomä. Nuni ꞌnehe bä pengi ngeꞌä himbi zu̱di habu̱ bi no̱ge. Rä Noe bi me̱hni mänꞌaki, nubye̱ bä pengi ko nꞌa rä xii de gä olibo ha rä piko. Yä dehe xki gäi. ꞌNe po rä hñuu rä mꞌiki rä Noe bi me̱hni näꞌä rä palomä mänꞌaki, ꞌne nubye̱ hää bi dini habu̱ xki yꞌotꞌi pa dä mꞌu̱i.

Nubye̱, Äjuä bi zofo rä Noe. ꞌNe bi ꞌñembi: “Po̱ni de rä arka. Tsitsꞌi gatꞌho ri familia ꞌne nuꞌu̱ yä zuꞌue”. Xki njotꞌi ha rä arka thogi de nꞌa nje̱ya. ¡Hängu rä johya bi me̱ꞌtsi rä Noe ’ne rä familia mi bo̱ni de ha rä arka!