AOTSAED long ark, pipol gohed nomoa long evriday living bilong olketa. Olketa still no bilivim Flood bae kam. Maet olketa barava laflaf fogud. Bat then olketa no laflaf nao.

Seknomoa, wata start for foldaon. Hem foldaon from skae olsem taem iu kapsaetem wata from wanfala baket. Noah hem talem tru samting! Bat hem tu leit nao for eniwan moa for go insaed long ark. Jehovah nao hem satem door strong.

No longtaem nomoa olketa flat ples fulap long wata nao. Wata hem kamap olsem olketa bigfala river. Hem brekem olketa tree and rolim olketa big ston, and mekem bigfala noise. Olketa pipol fraet fogud. Olketa klae go ap long haefala ples. Masbi olketa ting go bak and sorre nao from olketa no lisin long Noah and go insaed long ark taem door hem still open for olketa! Bat hem tu leit nao.

Wata hem gohed for kamap big and big. For 40 day and 40 naet wata foldaon from skae. Wata go ap followim saed bilong olketa maunten, and no longtaem hem kavarem olketa barava haefala maunten tu. So olsem God hem talem finis, evri pipol and animal aotsaed long ark olketa dae. Bat evriwan insaed stap sef.

Noah and olketa son bilong hem buildim ark long gudfala wei. Wata hem liftimap ark, and hem float antap long wata. Then wanday, bihaen rain hem stop, sun hem start for shaen. Evri samting luk difren tumas! Bigfala sea nomoa stap evriwea. And only samting wea stap hem ark wea float antap.

Olketa giant no stap nao. Olketa no stap moa for spoelem pipol. Evriwan long olketa dae, mami bilong olketa and evri nogud pipol tu. Bat wanem nao happen long olketa dadi bilong olketa?

Olketa dadi bilong olketa giant no pipol olsem iumi. Olketa hia angel wea kam daon for stap long earth olsem olketa man. So taem Flood hem kam, olketa no dae witim evri narafala pipol. Olketa leavim body bilong olketa olsem man, and go bak long heven olsem olketa angel. Bat God no letem olketa kamap part long famili bilong olketa angel bilong hem moa. So olketa kamap olketa angel bilong Satan. Bible kolem olketa hia olketa demon.

God mekem wanfala wind hem blow, and wata bilong flood start for go daon. Faevfala month bihaen, ark hem pas antap long wanfala maunten. Plande day go pas, and olketa insaed long ark savve lukim top bilong narafala maunten. Wata hem gohed for gogo daon.

Then Noah letem wanfala blak bird wea garem nem raven for go aot from ark. Hem flae for lelebet taem and then hem kam bak, bikos hem no savve faendem gudfala ples for stap. Hem gohed for duim diswan, and evritaem hem kam bak for rest long ark.

Noah laek for savve sapos wata hem go daon long earth, so next taem hem sendem aot wanfala kurukuru from ark. Bat datfala kurukuru hem kam bak tu bikos hem no savve faendem ples for stap. Noah sendem aot mek-tu taem, and hem tekem kam bak wanfala olive leaf long mouth bilong hem. So Noah savve wata go daon nao. Noah sendem kurukuru moa for mek-thri taem, and gogo hem faendem wanfala drae ples for stap.

So God hem tok long Noah. Hem sei: ‘Go aot from ark. Tekem full famili bilong iu and olketa animal witim iu.’ Olketa stap insaed long ark for winim wanfala year finis. So iumi savve tingim hao olketa hapi tumas for go aotsaed moa and for stap laef tu!