NA DOROSEI fu na ark den sma ben go doro nanga a srefi libi fu den. Den no ben bribi ete taki a Frudu ben o kon. Den ben musu e lafu moro leki wán ten na fesi. Ma heri esi den no ben o lafu moro.

Wantronso watra ben bigin fadon. A ben fadon leki te yu e kanti watra komoto na wan embre. Noa ben abi leti! Ma now a ben de tumusi lati gi iniwan sma fu go na ini na ark. Yehovah ben sroto a doro bun.

Heri esi den lagi presi ben kon sungu. A watra ben kon de leki bigi liba. A ben rutu bon puru, lolo bigi ston gowe èn ben meki wan bigi babari. Den sma ben kon frede. Den ben kren go na den moro hei presi. O, fa den ben e winsi now, taki den ben arki Noa èn ben go na ini na ark na a ten di a doro ben opo ete! Ma now a ben de tumusi lati.

A watra ben kon hei moro nanga moro. A watra ben fadon komoto na loktu 40 dei nanga 40 neti. A ben kren sei den bergi go na loktu èn heri esi den moro hei bergi srefi ben tapu nanga watra. Na so ala sma nanga meti na dorosei fu na ark ben dede, soleki fa Gado ben taki. Ma ala sma na ini na ark ben tan na libi.

Noa nanga en manpikin ben bow na ark bun. A watra ben opo na ark èn a ben tan dribi leti na tapu a watra. Ne wan dei, baka di na alen tapu, dan son ben bigin skèin. Ai, dati ben de wan sani fu si! Noti moro leki wan bigi se na ala sei. Soso na ark di ben e dribi na tapu a watra ben de fu si.

Now den langa sma no ben de moro. Den no ben kan du libisma ogri moro. Den nanga den mama fu den nanga den tra ogri sma ben dede. Ma san ben pasa nanga den papa fu den?

Den papa fu den langa sma no ben de libisma leki wi. Den ben de engel, di ben saka kon na grontapu fu libi leki mansma. Sobun, di a Frudu ben kon, den no ben dede nanga den tra sma. Den ben gowe libi a libisma skin di den ben meki gi densrefi, èn den ben go baka na hemel leki engel. Ma den no ben kisi pasi moro fu de wan pisi fu na osofamiri fu den engel fu Gado. Fu dati ede den ben kon tron den engel fu Satan. Bijbel e kari den, ogri yeye.

Now Gado ben meki wan winti wai, èn den watra fu a frudu ben bigin saka. Feifi mun na baka, na ark ben tan fasi na tapu na ede fu wan bergi. Furu dei moro ben pasa, bifo den sma na ini na ark ben kan si den ede fu den bergi. A watra ben tan saka moro nanga moro.

Ne Noa ben lusu wan blaka fowru gowe fu na ark. A fowru frei gowe wan pisi ten, dan a drai kon baka, bika a no ben feni wan presi fu tan. A ben tan du disi nomo èn ala tron te a ben drai kon baka, a ben saka sidon na tapu na ark.

Noa ben wani si efu a watra ben saka gowe kaba. Fu dati ede a ben meki wan doifi frei gowe now fu na ark. Ma a doifi ben drai kon baka tu, bika a no ben feni wan presi fu tan. Noa ben seni a doifi gowe fu a di fu tu tron èn a ben tyari wan olèiftaki kon na ini en mofo. Na so Noa ben sabi taki a watra ben saka. Noa ben seni a doifi gowe fu a di fu dri tron, èn now fosi a ben feni wan drei presi fu tan.

Now Gado ben taigi Noa: ’Komoto na a ark. Teki yu heri osofamiri nanga den meti go nanga yu.’ Den ben tan moro leki wan yari na ini na ark. Sobun, wi kan frustan fa den alamala ben breiti fu de na dorosei baka èn fu de na libi!