REXA̱A̱ náa arca, xa̱bu̱ kuwa xóo má nikuwa nákha ginii. Xóó lá tsénimbu̱ún rí ma̱ʼkha̱ Ruʼwambiiʼ. Nindu̱ʼwa̱ wéñuʼ xa̱bu̱ xóo nimbá miʼtsú túndu̱ʼwa̱. Mú taʼni má mba̱yu̱u̱ʼ rí niniñanʼ rundu̱ʼwa̱.

Nda̱a̱ ajngáa nigíʼdu̱u̱ nijpátrigu ruʼwa náa mekhuíí. Nijpátrigu ruʼwa asndu xóo índo̱ mbáa naxidii iyaʼ ga̱jma̱a̱ mbá ru̱jtu̱. ¡Gajkhun rí niʼthí Noé! Mu nimbáa nánguá xóo mato̱ʼo̱o̱ náa arca. Jeobá Dios nirugua̱a̱ májánʼ xkrugua.

Tájyúuʼ índo̱ nijúgoo xúgíʼ náa xkua. Iyaʼ ni̱jkha̱ raʼni asndu xóo mañu. Na̱jkha̱ kagu̱u̱ ixi̱ asndu itsí mba̱ʼu̱ eʼba̱a̱n, ma̱ngaa nawan wéñuʼ. Xa̱bu̱ nimiñun. Nitsimún náa kúbá rí itháan mitsidánʼ. ¡Ay asndu níkhuu nindúún mudxawíín rí niʼthí Noé ga̱jma̱a̱ matu̱ʼu̱u̱n náa arca nákha xóó paʼta xkrugua! Mú ninújngoo má mbiʼi rúʼko̱.

Iyaʼ ni̱jkha̱ ragiʼi ratsimuu itháan. Ndijyúuʼ 40 mbiʼi 40 mbruʼun dí nijpátrigu ruʼwa mekhuíí. Iyaʼ nitsimuu asndu náa kúbá, tájyúuʼ nirogoo kúbá rí itháan mitsidánʼ. Ikha kayuʼ xóo má Dios niʼthí, xúgínʼ xa̱bu̱ ga̱jma̱a̱ xujkhúʼ bi̱ na̱nguá nitu̱ʼu̱u̱n náa arca nikháñun. Mú xúgínʼ bi̱ nitu̱ʼu̱u̱n nikáwíín.

Noé gajmíi̱n e̱ji̱i̱n ni̱ni̱ mbá ñajunʼ májánʼ rí ni̱ni̱ arca. Iyaʼ nikuxi arca, ma̱ngaa ni̱jkha̱ kruámuʼ náa tsu̱du̱u̱ iyaʼ. Ikhú, mbá mbiʼi, índo̱ niwi̱ji̱i̱ raxnúu ruʼwa, ikhú A̱jkha̱ʼ nigíʼdu̱u̱ nimbiʼi. ¡Ra̱ʼkhá tháán mitsaan kujmaa! I̱ndó iyaʼ nakujmaa kajnííʼ xúgíʼ ku̱ba̱ʼ. I̱ndó arca rí nandoo nakujmaa ngruámuʼ náa tsu̱du̱u̱ iyaʼ.

Nánguá kúwi̱i̱n xa̱bu̱ mba̱ʼu̱u̱n wéñuʼ. Ní xátangi̱i̱n muniu̱u̱n dí ra̱májánʼ xa̱bu̱. Xúgínʼ nikháñun, gajmiún rudún xúʼko̱ má eʼwíínʼ xa̱bu̱ xkawiinʼ. Mu ndiéjunʼ niguaʼnii anu̱ún xá.

Anu̱ún xa̱bu̱ mba̱ʼu̱u̱n wéñuʼ na̱nguá ninindxu̱ún xa̱bu̱ xóo ikháanʼ. Ninindxu̱ún ángeles bi̱ niguájtaa náa tsu̱du̱u̱ Ku̱ba̱ʼ mu makuwíin xóo xa̱bu̱. Ikha jngó, índo̱ nixnúu Ruʼwambiiʼ, tákhañun xóo eʼwíínʼ xa̱bu̱. Niniñanʼ ranindxu̱ún xóo xa̱bu̱, ma̱ngaa nigutangi̱i̱n mekhuíí xóo ángeles. Mu nánguá niniñunʼ manindxu̱ún ángeles bi̱ kúwi̱i̱n gajmíi̱n Dios. Ninindxu̱ún ángeles ndrígóo Satanás. Náa Biblia naxná mbiʼñún xa̱bu̱ wéñiʼ ángeles bige̱.

Rí xúgi̱ Dios niʼni rí maxnúu giñánʼ gakhi̱i̱ wéñuʼ, ikhú ni̱jkha̱ raguuʼ iyaʼ. Witsu igu̱nʼ nda̱wa̱á arca nigrigu náa inu kúbá. Ninújngoo mba̱yu̱u̱ʼ mbiʼi, ikhú bi̱ kúwi̱i̱n náa awúu̱n arca nindoo niyaxi rexa̱a̱, ma̱ngoo nindoo ndiyáá inuu kúbá. Iyaʼ ni̱jkha̱ raguuʼ.

Ikhú Noé niniñuʼ rí mbáa ñu̱ʼu̱ skuniʼ bi̱ mbiʼyuu yu̱wa̱ʼ magajnúu. Ñu̱ʼu̱ bugi̱ na̱jkha̱ mbá mbégu̱ʼ ikhú naguta̱nga̱a̱ numuu rí tséxkamaa náa ma̱ndoo maguanúu. Rígi̱ niʼni ma xúʼko̱, mámbá rí na̱jkha̱ nákhi e̱ʼkha̱a̱ nagrigu náa arca.

Noé nindoo mbaʼyoo á mu na̱jkha̱ raguuʼ iyaʼ náa tsu̱du̱u̱ ku̱ba̱ʼ, nda̱wa̱á nikuʼmaa mbáa paloma. Ma̱ngaa paloma bigi̱ nitanga̱a̱, numuu rí táxkamaa náa maguanúu. Noé nikuʼmaa rí maʼni a̱jma̱ aʼphu̱, ikhú ikhaa nitanga̱a̱ ga̱jma̱a̱ mbá inúu olivo náa xúrawunʼ. Iyaʼ ni̱jkha̱ raguuʼ. Noé nikuʼmaa mbu̱júu̱ʼ paloma rí maʼni ajtsú aʼphu̱, asndu ikhú nixkamaa ku̱ba̱ʼ mixooʼ náa maguanúu maxtáa.

Rí xúgi̱ Dios niʼtáminaʼ ga̱jma̱a̱ Noé. Niʼthúu̱n: ‹Agajnáaʼ náa awúu̱n arca. Ayuʼ xtiin bi̱ kuwa náa guʼwáaʼ ga̱jma̱a̱ xujkhúʼ›. Nikúwi̱i̱n náa awúu̱n arca itháan rí mbá tsiguʼ kañiʼ. ¡Atatsaʼwáminaʼ rí nidxún wéñuʼ numuu rí kúwi̱i̱n rexa̱a̱ ga̱jma̱a̱ rí kúwi̱i̱n nduya!