IHA ró boot nia liʼur, ema moris hanesan baibain. Sira la fiar katak Rai-Nabeen sei mosu. Sira hamnasa liután. Maibé lakleur, sira para hamnasa.

Derrepente, udan hahú tun ba rai. Udan tau hanesan bee fakar husi masa. Afinál Noé loos! Maibé, tarde liu ba ema hotu iha liʼur atu tama iha ró boot. Tanba Jeová taka metin ona odamatan.

Lakleur, bee taka rai tetuk hotu. Bee sai hanesan mota barak. Bee halo ai-hun monu no duir fatuk boot, no halo tarutu makaʼas. Ema hotu taʼuk. Sira saʼe foho. Aiá! Se karik sira rona ba Noé, no tama ró boot bainhira odamatan loke hela ba sira! Maibé agora tarde liu.

Bee saʼe no saʼe naruk liu. Udan tau durante loron 40 no kalan 40. Bee saʼe toʼo foho, no lakleur mós taka foho aas liu. Nuneʼe, hanesan Maromak dehan, ema no animál hotu iha ró boot nia liʼur mate. Maibé, ema iha ró boot nia laran moris.

Noé no nia oan-mane sira halo ró boot neʼebé diʼak. Ró boot neʼe saʼe no namlele iha bee leten. Loron ida, udan para no loro-matan hahú naroman. Aiá! Sira hakfodak tebes tanba haree tasi taka rai hotu! Ita bele haree deʼit ró boot neʼe namlele iha tasi leten.

Jigante sira lakon ona. Sira la bele halo aat ema tan. Sira hotu mate, hamutuk ho sira-nia inan no ema aat hotu. Maibé, saida mak akontese ba sira-nia aman sira?

Jigante nia aman sira laʼós ema hanesan ita. Sira mak anju neʼebé mai hodi moris iha Rai hanesan ema. Nuneʼe, bainhira Rai-Nabeen mosu, sira la mate hamutuk ho ema seluk. Sira la uza tan isin hanesan ema, no sira fila fali ba lalehan nuʼudar anju. Maibé, Maromak la fó lisensa tan ba sira atu sai família ho anju seluk. Nuneʼe, sira sai Satanás nia anju. Iha Bíblia laran sira iha naran demóniu.

Maromak halo anin huu, no rai-nabeen komesa tun. Fulan lima liutiha, ró boot para iha foho leten. Loron barak liutiha, ema iha ró boot laran bele hateke ba foho sira-nia leten. Bee kontinua atu tun neineik-neineik.

Depois, Noé husik manu metan sai husi ró boot. Manu neʼe semo tempu uitoan no fila fali, tanba la iha fatin atu tun. Manu neʼe semo dala barak, maibé sempre fila fali no tun iha ró boot.

Noé hakarak haree se bee tun tiha ona. Tan neʼe, nia husik manu-pombu sai husi ró boot. Maibé, manu-pombu neʼe mós mai fali tanba la bele hetan fatin atu hela. Noé husik manu neʼe sai dala ida tan, no nia lori fali ai-oliveira tahan iha nia ibun. Entaun, Noé hatene katak bee tun tiha ona. Noé husik manu-pombu neʼe sai ba dala tolu, no ikusmai, nia hetan fatin maran atu moris.

Agora Maromak koʼalia ba Noé. Nia hateten: ‘Sai husi ró boot. Lori sai ó-nia família no animál hotu hamutuk ho ó.’ Sira hela iha ró boot laran tinan ida liu. Nuneʼe, ita bele hanoin toʼok katak sira kontente tebes tan sira moris no bele sai ba liʼur!