10-нҗы хекая

Бүтиндүнйә тупаны

ГӘМИНИҢ дашында галан адамлар өңкүси ялы яшаярды. Олар бүтиндүнйә тупанының болҗагына хенизем ынанмаярды. Белки, олар өңкүден-де көп гүлендирлер. Йөне олар гүлкүлерини тиз гойдулар.

Бирден сув шабырдап башлады. Сув бедреден гуюлян ялыды. Нухуң айдышы ялы хем болды. Йөне инди гәмә гирерден гичди. Себәби Ехова гапыны пугта япды.

Басым әхли җүлгелери сув алды. Сув гүйчли сил болуп гелйәрди. Сув агачлары йыкан-юмран эдип, улы дашлары тогалап, гүпүрди билен алып барярды. Адамлары горкы басды. Олар бейик ерлере дырмашярдылар. Олар Нуха гулак асмандыгы ве гәминиң гапысы ачыкка гирмәндиги үчин нәхили өкүнен болсалар герек! Йөне инди гичди.

Сув гитдигиче ёкары галярды. Ол кырк гиҗе-гүндизләп гуйды. Сув дагың эңңиди билен ёкары галып, тизден иң бейик дагларам сув астында галды. Худайың айдышы ялы хем болды. Гәмиң дашындакы әхли адамлар хем-де хайванлар хеләк болды. Гәмидәки адамлар болса дири галдылар.

Нух огуллары билен гәмини биркемсиз эдип гурды. Гәми сув билен ёкары галып, онуң йүзүнде йүзйәрди. Соңра ягыш диңип, гүн чыкды. Даш-төверегиң нәхили горкунчдыгына бир серет! Нирә гөз айласаң-да, даш-төверек диңе сувды. Сувуң йүзүнде диңе гәми барды.

Инди әпет адамлар ёкды. Гайдып олар адамлара зыян етирип билмезлер. Олар эҗелери ве галан эрбет адамлар билен бирликде хеләк болдулар. Йөне оларың аталарына нәме болдука?

Әпет адамларың аталары бизиң ялы адаты адамлардан дәлди. Олар адамлар ялы яшамак үчин, ер йүзүне дүшен перишделерди. Шонуң үчинем бүтиндүнйә тупанында бейлеки адамлар билен хеләк болмадылар. Олар ынсан беденлерини ташлап, перишде болуп гөге гайдып бардылар. Эмма инди олара Худайың перишделериниң машгаласына гирмәге ёл берилмеди. Шонуң үчин олар Шейтаның перишделери болдулар. Мукаддес Язгыларда олара җынлар дийилйәр.

Соңра Худай ел өвүсдирди, тупаның сувы болса азалып уграды. Гәми бәш айдан соң, бир дагың депесинде сакланды. Гәмидәкилер даг депелерини гөрйәнчәлер, ене-де көп гүн гечмелиди. Сув кем-кемден азалярды.

Шонда Нух гәмиден бир гарга учурды. Аз салым айланып, гарга гайдып гелди, себәби гонмага ер тапмады. Шейдип Нух гарганы бирнәче гезек учурды, хер гезегем ол ер тапман гәмә гонярды.

Нух сувуң ер йүзүнде азаландыгыны билмек үчин, гәмиден бир кепдери учурды. Йөне кепдери хем гонмага ер тапман гайдып гелди. Эмма Нух оны икинҗи сапар учуранда, ол зейтун япрагыны алып гелди. Шонда Нух сувуң азаланыны билди. Нух кепдерини үчүнҗи сапар учурды. Ол ахыры гуры ер тапып, шол ерде галды.

Инди Худай Нуха йүзленип: «Гәмиден машгалаңы хем-де әхли хайванлары алып чык» дийди. Олар гәмиде бир йылдан говрак болдулар. Шонуң үчин оларың ене-де ягтылыга чыкып, өзлериниң дири галандыгына бегенишлерини гөз өңүне гетир!

Барлык 7:10—24; 8:1—17; 1 Петрус 3:19, 20.