Nganea 10: Maḓi Mahulu
Nnḓa ha gungwa, vhathu vha ḓi tshila u fana na u thomani. Vha si tende uri Maḓi Mahulu a ḓo ḓa. Vha fanela u vha vho sea u fhira naho hu lini. Fhedzi nga u ṱavhanya vha litsha u sea.
![Vhathu vho tshuwaho na zwipuka zwo tshuwaho vho tangwa nga maḓi mahulu](https://assetsnffrgf-a.akamaihd.net/assets/l/my/my_VE/10a.jpg)
Nga u ṱavhanya maḓi a thoma u na. A shuluwa lutomboni samusi ni tshi shulula maḓi nga bakete. Noaxe o vha o amba ngoho! Fhedzi ho vha ho no lengesa kha naho e nnyi u dzhena gungwani. Muṋango wo vha wo valwa wa khwaṱhiswa nga Yehova.
Nga u ṱavhanya fhasi ha tibea. Maḓi a nga milambo mihulu. A sukumedza miri a phigulusa matombo mahulu, a ita phosho khulu. Vhathu vha ofha. Vha gonya dzithavha. Yowee, vha tama hani uri arali vha vhe vho thetshelesa Noaxe vha dzhena gungwani musi muṋango u tshee wo vulea! Fhedzi ha vha u lenga.
Maḓi a ḓi gonyela nṱha. Maḓi a shuluwa lutomboni maḓuvha a 40 na vhusiku ha 40. A gonya dzithavha, nahone nga u ṱavhanya na dzithavha khulwanesa dza tibea. Ngauralo samusi Mudzimu o amba, vhathu vhoṱhe na zwipuka nnḓa ha gungwa zwa fa. Fhedzi muṅwe na muṅwe gungwani o vha o vhulungea.
Noaxe na vharwa vhawe vho vha vho ita mushumo wavhuḓi vha tshi fhaṱa gungwa. Maḓi a ḽi takulela nṱha, ḽa papamala nṱha-nṱha ha maḓi. Zwenezwo ḽiṅwe ḓuvha, musi mvula yo tsha, ḓuvha ḽa thoma u penya. Ḽa vha bono ḽingafhani! Ho vha hu na lwanzhe luthihi luhulu hoṱhe. Tshe tsha vha tshi tshi vhonala fhedzi ḽo vha ḽi gungwa ḽo papamala nṱha.
![Gungwa ḽo papamala nṱha ha maḓi](https://assetsnffrgf-a.akamaihd.net/assets/l/my/my_VE/10.jpg)
Vhanna vhalapfu vho vha vho ṱuwa. A vha tsha ḓo vha hone u huvhadza vhathu. Vhoṱhe vho vha vho fa, khathihi na vhomme avho na vhathu vhavhi. Fhedzi ho itea mini kha vhokhotsi avho?
Vhokhotsi a vhanna vhalapfu vho vha vha si vhathu vhukuma sa riṋe. Vho vha vhe vharuṅwa vhe vha ḓa u dzula sa vhathu kha ḽifhasi. Ngauralo musi Maḓi Mahulu a tshi da, vha si fe na vhathu vhoṱhe. Vha litsha u shumisa mivhili ya ṋama ye vha ita, vha humela ṱaḓulu sa vharuṅwa. Fhedzi a vho ngo tsha tendelwa u vha tshipiḓa tsha vharuṅwa vha Mudzimu. Ngauralo vha vha vharuṅwa vha Sathane. Bivhilini vha vhidzwa mademona.
Mudzimu zwino a ita uri muya u vhudzule, maḓi mahulu a thoma u xa. Miṅwedzi miṱanu nga murahu gungwa ḽa awela nṱha ha thavha. Maḓuvha manzhi a fhira, nahone vha re gungwani vho vha vha tshi nga sedza nnḓa vha vhona ṱhodzi dza dzithavha. Maḓi a ḓi xa, a ḓi xa.
Zwenezwo Noaxe a bvisa gungwani tshiṋoni tshi vhidzwaho funguvhu. Ḽo vha ḽi tshi fhufha tshifhinganyana ḽa dovha ḽa vhuya, ngauri ḽo vha ḽi sa wani fhethu havhuḓi ha u kavha. Ḽa ḓi ita ngaurali ḽi tshi vhuya ḽi tshi kavha kha gungwa.
![Ḽiivha](https://assetsnffrgf-a.akamaihd.net/assets/l/my/my_VE/10b.jpg)
Noaxe a ṱoḓa u vhona arali maḓi o fhela kha ḽifhasi, ngauralo a bvisa ḽiivha gungwani. Fhedzi na ḽiivha ḽa vhuya ngauri a ḽo ngo wana fhethu ha u dzula. Noaxe a ḽi bvisa lwa vhuvhili, ḽa vhuya na ṱari ḽa muṱwari mulomoni waḽo. Ngauralo Noaxe a ḓivha uri maḓi o xa. Naoxe a bvisa ḽiivha lwa vhuraru, nahone mafheleloni ḽa wana fhethu ho omaho ha u dzula.
Mudzimu zwino a amba na Noaxe. A ri: Ìbva gungwani. Ibva na muṱa wau woṱhe na zwipuka.’ Vho vha vhe gungwani u fhira ṅwaha woṱhe. Ngauralo ri nga tou humbulela uri vhoṱhe vho vha vho takala hani u dovha u vha nnḓa na u vha vha tshilaho!
Genesi 7:10-24; 8:1-17; 1 Petro 3:19, 20.
Mbudziso
- Ndi ngani hu si na muthu na muthihi we a dzhena gungwani musi mvula i tshi thoma?
- Yehova o ita uri mvula ine maḓuvha mangana na vhusiku vhungana, nahone maḓi o vha o tsa lungafhani?
- Ho itea mini kha gungwa musi maḓi a tshi thoma u tibedza ḽifhasi?
- Naa vhathu vhalapfu vho ponyoka Maḓi Mahulu, nahone vhe vha vha vhe vhokhotsi a vhathu vhalapfu vho mbo ḓi vha mini?
- Ho itea mini kha gungwa nga murahu ha miṅwedzi miṱanu?
- Ndi ngani Noaxe o bvisa funguvhu gungwani?
- Noaxe o ḓivha hani uri maḓi o fhela kha ḽifhasi?
- Musi vho no fhedza tshifhinga tshi fhiraho ṅwaha vhe gungwani Mudzimu o vhudza Noaxe na muṱa wawe uri vha ite mini?
Mbudziso dzo engedzeaho
- Vhalani Genesi 7:10-24.
Ndi zwithu-ḓe zwi tshilaho zwe zwa fheliswa kha ḽifhasi? (Gen. 7:23)
Maḓi mahulu o xa nga murahu ha tshifhinga tshingafhani? (Gen. 7:24)
- Vhalani Genesi 8:1-17.
Genesi 8:17 i sumbedza hani uri ndivho ya u thoma ya Yehova nga ḽifhasi a yo ngo shanduka? (Gen. 1:22)
- Vhalani 1 Petro 3:19, 20.
Musi vharuṅwa vha mashandukwa vha tshi humela ṱaḓulu, vho haṱulwa hani? (Yuda 6)
Mafhungo a Noaxe na muṱa wawe a khwaṱhisa hani fulufhelo ḽashu ḽa uri Yehova u a kona u ponyokisa vhathu vhawe? (2 Pet. 2:9)