HA GAWAS han arka, an mga tawo nagpadayon ha ira normal nga pagkinabuhi. Diri pa gihapon hira natuod nga magkakaada hin Baha. Sigurado nga nagtinawa gud an mga tawo. Kondi waray pag-iha, inundang hira ha pagtinawa.

Nagtikang na tumarithi. Binuhos an makusog nga uran tikang ha langit, sugad ito han imo pagbuhos hin tubig tikang ha balde. Husto gud hi Noe! Kondi urhi na para ha bisan hin-o nga makasulod ha arka. Ginsadhan na ni Jehova hin maopay an purtahan.

Waray pag-iha natabonan na han katubigan an ngatanan nga hagbubo nga lugar. An katubigan nagin sugad hin dagku nga mga salog. Tungod han makusog nga sulog hito, nagkatutumba an kakahoyan ngan nangaliding an dagku nga mga bato, salit nagkaada hin duro nga aringasa. Nagkahahadlok an mga tawo. Nagkasagka hira ngadto ha mas higtaas nga mga lugar. Kon namati la unta hira kan Noe ngan sinulod ha arka han puydi pa hira makasulod hito, talwas unta hira! Kondi waray na hira mahihimo.

An katubigan padayon nga nagtikahilarom pa gud. Nag-inuran ha sulod hin 40 ka adlaw ngan hin 40 ka gab-i. Inabot na ha kabukiran an kahitaas han katubigan, ngan waray pag-iha natabonan na bisan an gihitaasi nga kabukiran. Salit sugad la han ginsiring han Dios, nagkamatay an ngatanan nga tawo ngan hayop ha gawas han arka. Kondi talwas an ngatanan nga aadto ha sulod hito.

Maopay gud an pagkahimo ni Noe ngan han iya mga anak han arka. Linutaw ito ha katubigan. Katapos, usa ka adlaw, han inundang an pag-inuran, sinirak na. Urusahon gud adto! Puro la katubigan an bug-os nga tuna. Ngan waray iba nga nakikita kondi an arka la nga nalutaw ha katubigan.

Waray na an mga higante. Diri na gud nira mapapakurian an mga tawo. Nagkamatay na hira ngatanan, upod an ira mga nanay ngan an magraot nga mga tawo. Kondi ano an nahitabo ha ira mga tatay?

An mga tatay han mga higante diri tinuod nga mga tawo sugad ha aton. Mga anghel hira nga kinanhi basi mag-ukoy dinhi ha tuna pariho han mga tawo. Salit han inabot an Baha, waray hira magkamatay upod han mga tawo. Waray na nira gamita an ira tawhanon nga mga lawas, ngan binalik hira ha langit sugad nga mga anghel. Kondi waray na hira tuguti nga magin bahin han pamilya han mga anghel han Dios. Salit nagin mga anghel hira ni Satanas. Ha Biblia, tinatawag hira nga mga demonyo.

Nagpahuyop an Dios hin hangin, ngan hinay-hinay nga hinubas an katubigan. Paglabay hin lima ka bulan, sinanglad an arka ha bawbaw han usa nga bukid. Paglabay hin damu pa ka adlaw, nakikita na han aadto ha sulod han arka an mga pungkay han kabukiran. Padayon nga nagtikahubas an katubigan.

Katapos, ginpalupad ni Noe ha gawas han arka an uwak, usa ito nga itom nga tamsi. Naglulupad-lupad ito hin madaliay ngan nabalik tungod kay waray pa nahahaponan. Pauroutro nga ginpapalupad ito ngan ha kada pagbabalik, napahuway ito ha arka.

Karuyag ni Noe nga masiguro kon hinubas na an katubigan ha tuna, salit an sunod nga ginpalupad niya ha gawas han arka amo an sarapati. Kondi binalik liwat ito tungod kay waray pa ito lugar nga nahahaponan. Ginpalupad utro ni Noe an sarapati ha gawas han arka, ngan binalik ito nga may-ada dahon han olibo ha tuka. Tungod hito, hinbaroan ni Noe nga hinubas na an katubigan. Ginpalupad ni Noe an sarapati ha ikatulo ka beses, ngan hito nga higayon nakakita na an sarapati hin mamara nga lugar nga mauukyan.

An Dios nagsiring yana kan Noe: ‘Gawas ha arka upod an imo bug-os nga pamilya ngan an mga hayop.’ Sobra usa ka tuig nga nakadto hira ha sulod han arka. Salit, sigurado kita nga nalipay gud hira ngatanan tungod kay nakagawas na hira ngan waray maraot nga nahitabo ha ira!