Tantara 10

Mahalen̈y Be Nampafofo Tany Jiaby

AMBELAN̈A sambo, olo mbala nan̈ano fiain̈ana karaha isan’andra fo. Irô tsy nino foeky fa ho avy mahalen̈y be hampafofo tany jiaby. Tokikin-drô nahainare fo. Tsy hitokiky eky irô teteky iô.

Tiô fo, mahalen̈y latsaka boaka an-dan̈itry, karaha rano nahidin̈y boaka amy bakôly in̈y. Narin̈y ankitin̈y raha nivolan̈in’i Noa! Kanefa, zay olo tsy tan̈aty sambo tao, tsy tafiditry eky. Irô efa tara loatra. Jehovah efa namody varavaran̈a sambo io mare be.

Tsy ela, efa fofo tany mariva jiaby. Rano tamy zen̈y nanjary karaha ten̈arano be. Rano nandraongana kakazo, nampitabiribiry vato maro maventy, ke nantsintsin̈y be tamy zen̈y. Olo jiaby navozo. Irô nan̈aniky tan̈abo. Tsy nan̈ano karaha zen̈y irô, izikoa nan̈araka volan̈a Noa. Fa iziô, irô fa tara.

Nahaibe fo rano. Mahalen̈y be fo tan̈atin’ny 40 andra, 40 alin̈y. Nanonga amy bongo rano, nata bongo farany an̈abo mbala dobo fo. Karaha raha nivolan̈in’ny Zan̈ahary, naty olo ndreky biby jiaby tambelan̈a sambo. Fa zay olo tan̈aty sambo tao, tsy naty.

Nan̈ano asa tsara Noa ndreky zanany nan̈amboatra sambo in̈y. Rano koa fa nanonga, sambo in̈y niempo tan̈abo. Tandraraiky amy zay, koa fa vita mahalen̈y, nanampôno nipiriaka masoandra. Karakôry eky tambelan̈a sambo tan̈y! Ranomasin̈y fo tany jiaby. Sambo in̈y zaraiky fo raha niempo tan̈abony tiô.

Tsisy eky olo befatiarin̈y aby in̈y. Tsy iô eky irô hampijaly olo. Irô jiaby ndreky ry maman-drô naty niaraka tamin’olo ratsy fan̈ahy. Aia fo basy baban-drô?

Baban-drô tsy olo karaha atsika. Irô io anjely boaka tan-dan̈itry, nipetraka niaraka tamin’olo tatỳ. Izikoa fa navy mahalen̈y be in̈y, irô tsy naty niaraka tamin’olo jiaby. Nialan-drô vatan̈an’olombelon̈o, irô nanjary anjely, baka iô nimpody an-dan̈itry an̈y. Fa irô koa fa navy tan̈y, tsy naman’anjely tsara aby man̈araka volan̈a Zan̈ahary eky. Irô nanjary anjelin’i Satana. Demony ikahian̈a irô io amy Baiboly.

Zan̈ahary nandefa tsiko mare namparitry rano. Dimy fanjava tafara, sambo in̈y tavela tan̈abo bongo. Koa fa ela, irô tan̈aty sambo tao nahita tendron’ny bongo lavitry. Rano nahainijotso fo.

Noa nan̈aboaka goàka araiky nitilin̈y. Ela izy tan̈y. Baka iô izy nimpody, fôtony tsisy tany maiky ibidan̈any. Matetiky izy nalefa, fa mbala nimpody tan̈aty sambo tao fo.

Noa ti hahay asa fa ritry rano. Izy nandefa pizin̈y. Kanefa pizin̈y in̈y nimpody, fôtony tsisy tany ibidan̈any. Noa koa fa nandefa izy fan̈indroeny, izy nimpody nitaondra ravin-draha tamy vavany. Tamy zen̈y Noa nahay fa naiky tany. Noa koa fa nandefa pizin̈y in̈y fan̈intelony, pizin̈y in̈y tsy nimpody eky, fôtony izy nahita tany ibidan̈ana.

Zan̈ahary nivolan̈a tamy Noa: ‘Miboaha amy zay anao. Indesa miboaka vadinao, ndreky ry zanakanao, ndreky biby jiaby an̈aty sambo ao.’ Efa taon̈o araiky mandilatra irô tan̈aty sambo tao. Karaha efa hitatsika irô mimoemoehy, ravoravo tafitsaka velon̈o!

Genesisy 7:10-24; 8:1-17; 1 Petera 3:19, 20.