KUSA kwa combo, ŵandu ŵajendelecele kutama ni umi mpela muŵatamilaga kala. Nganakulupililagape kuti cikumba ciciyice. Komboleka kuti ŵasekaga mnope kupundana nikalakose. Nambo mwangacelewa ŵalesile kuseka kula.

Mwakusisimucisya mesi gatandite kugwa. Gakuswice kutyocela ku mawunde mpela kuti mundu akukusula mesi m’citini. Nowa ŵasalaga yisyene! Nambo sambano yaliji yangakomboleka kuti mundu jwine jwalijose ajinjile mu combo. Yehofa ŵaliji ali awugele mnope litanga lila.

Mwacangakaŵa malo gosope gakutuluka gagumbele mesi. Mesigo gatandite kuŵa mpela sulo syekulungwakulungwa. Mesigo gagwisisye yitela, gapitikusyaga maganga gamakulungwakulungwa, soni gatendaga masegwe mnope. Ŵandu wakamwile woga. Ŵakwelaga malo ga yikwesya. Ŵasacililaga ali apikanile Nowa nikwinjila mu combo mula litanga mkanaliwugale! Nambo sambano ndaŵi jaliji jimasile.

Mesi gajendelecele kwela mwinani. Kwa masiku 40 musi ni cilo mesi gajendelecele kusuka kumaunde. Mesi gajendelecele kwela mpaka kulandanaga ni matumbi, mwacangakaŵa atamose matumbi gamalewu mnope gatiŵile. M’yoyo mpela muŵasalile Mlungu, ŵandu wosope ni yinyama yayaliji kusa kwa combo yawile. Nambo jwalijose juŵaliji mu combo nganawa.

Nowa ni ŵanace ŵakwe ŵakamwile masengo gambone gakutaŵa combo. Mesi gala ganyakwile combo, ni cajajaŵalaga penani pa mesi. Kaneko lisiku line, wula pajalesile kunya, lyuŵa lyatandite kuŵala. Kwalangwice kwabasi! Kosope kwaliji cinyasa cimo cekulungwa mnope. Cindu cimope cakaciweni mundu caliji combo cacaliji mkujajaŵala pamesipo.

Ŵandu ŵamacili mnope ŵala kwaliji kwangali sambano. Paliji pangali jemanjaji kuti ŵawulasyeje ŵandu. Wosopewo ŵaliji ali awile, yimpepe ni acimama ŵawo ni ŵandu ŵane wosope ŵakusakala. Nambo ana acatati ŵawo catendecele cici?

Acatati ŵawo ŵa ŵandu ŵamacili ŵala nganaŵa ŵandu ŵasyesyene mpela m’weji. Ŵaliji malayika gagayice kukutama pacilambo capasi mpela ŵandu. Sambano cikumba pacayice, nganawa yimpepe ni ŵandu ŵane wosope. Ŵalesile kamulicisya masengo yilu ya ŵandu yaŵalipanganyicisye yila, ni ŵawujile kwinani mpela malayika. Nambo nganiŵakunda kuti aŵe mu liŵasa lya malayika ga Mlungu. Ni sambano ŵaŵele malayika ga Satana. M’Baibulo akusagakolanga malayika gelega kuti yiŵanda.

Mlungu sambano ŵatendekasisye kuti jipuje mbungo, m’yoyo mesi ga cikumba gatandite kunandipa. Pali papite miyesi msano, combo cajimi penani pa litumbi. Gamasile masiku gejinji, kaneko ŵaŵaliji m’combo mula ŵakombolekaga kupawona pasa, nikupawonaga penani pa matumbi. Mesi gajendelecele kunandipa.

Kaneko Nowa ŵakopwesye mu combo mula cijuni cepiliwu cakolanjikwa likungulu. Likungululi lyagulukaga kwakandaŵi kaneko nikuwuja, ligongo nganilipataga malo gambone gakuti lijime. Lyajendelecele kutenda yeleyi nambo lyawujaga, kukupumula penani pa combo.

Nowa ŵasakaga kumanyilila naga mesi gala gajumilile pacilambo capasi, ni kaneko ŵakopwesyesoni mu combo mula njuŵa. Nambo njuŵajo jawusilesoni ligongo jalepele kupata malo gakutama. Nowa ŵajikopwesyesoni njuŵa jila kaŵili, ni jawusile jili jinyakwile lisamba lya citela ca maolifi kukamwa kwakwe. Sambano Nowa ŵayimanyi kuti mesi ganandipe. Kaneko Nowa ŵajitumisyesoni njuŵa jila katatu, pandaŵiji jagasimene malo gamajumu gakutama.

Sambano Mlungu ŵaŵecete kwa Nowa. Ŵatite: ‘Mkopoce mu combo yimpepe ni liŵasa lyenu lyosope yimpepe ni yinyama.’ Jemanjaji ŵatemi mu combo kupunda caka cimo. Agambe ganicisya mwaŵaŵelele ŵakusengwa, wosope paŵajawulaga kukutamasoni pasa, soni ali ni umi!