LE MÁAKOʼOB maʼ ookoʼob teʼ cheemoʼ láayliʼ maʼ tu kʼexoʼob baʼax ku beetkoʼobeʼ. Láayliʼ maʼ u oksaj óoltoʼob wa yaan u taal le Búulkabaloʼ. Bukaʼaj wal úuchik u jajaʼcheʼejoʼobeʼ. Baʼaleʼ, maʼ xáanchaj ka jaw u cheʼejoʼobiʼ.

Chéen ka wojchaj le jaʼoʼ. Kʼáax jeʼex u tóoxchʼintaʼal jaʼ yéetel upʼéel chʼóoyeʼ. ¡Jach jaaj le baʼax tiaʼalaj Noeoʼ! Baʼaleʼ, mix máak uláakʼ jeʼel u páajtal u yokol teʼ cheemoʼ. Tsʼoʼok kaʼach u kʼalaʼal jach maʼalob u joonai tumen Jéeoba.

Tuláakal kabal luʼumeʼ séeb úuchik u búulul. Le jaʼoʼ suunaj bey nukuch áalkab jaʼeʼ, kʼaʼam u juum táan u kóolik tu paach cheʼob yéetel nukuch tuunichoʼob. Le máakoʼoboʼ sajakchajoʼob. Naʼakoʼob teʼ tuʼux maas kaʼanloʼ. ¡Bukaʼaj wal úuchik u tsʼíiboltkoʼob ka u yuʼuboʼob u tʼaan Noé, yéetel ka oojkoʼob teʼ cheem le láayliʼ jeʼekʼab kaʼach u joonailoʼ! Baʼaleʼ, beooraaʼ mix baʼal jeʼel u páajtal u beetkoʼobeʼ.

Le jaʼoʼ maʼ jáaw u sen kaʼantaliʼ, kʼáax ich cuarenta kʼiinoʼob yéetel cuarenta áakʼaboʼob. Maʼ xáanchaj ka búul tuláakal le witsoʼob tak le u maas kaʼanliloʼoboʼ. Jach jeʼex úuchik u yaʼalik Dioseʼ, tuláakal máak yéetel baʼalcheʼob maʼ ookoʼob teʼ cheemoʼ kíimoʼob. Baʼaleʼ, le yanoʼob ichiloʼ maʼ kíimoʼobiʼ.

Noé yéetel u paalaleʼ tu beetoʼob upʼéel maʼalob meyaj le ka tu beetoʼob le cheemoʼ. Le jaʼoʼ tu chʼúuyaj le cheemoʼ, bey túunoʼ le cheemoʼ joʼopʼ u máan yóokʼol le jaʼoʼ. Upʼéel kʼiin le ka xuʼul u kʼáaxal le jaʼoʼ, le Kʼiinoʼ káaj u juul. ¿Baʼax ilaʼabi? Chéen upʼéel nojoch kʼáaʼnáab ku yilaʼal tuláakal tuʼux yéetel le cheem ku máan tu yóokʼoloʼ.

Le sen kaʼanal bakel máakoʼobeʼ kíimoʼob. Maʼ kun suutoʼob u beetoʼob kʼaas tiʼ mix máak. Láaj kíimoʼob paʼteʼ yéetel u mamaʼob bey xan uláakʼ máakoʼoboʼ. Baʼaleʼ, ¿baʼax úuch tiʼ u taataʼob?

U taataʼob le sen kaʼanal bakel máakoʼoboʼ, u jaajileʼ maʼ wíinkoʼob kaʼach jeʼexoʼoneʼ. Ángeloʼob éemoʼob teʼ Luʼum utiaʼal ka kuxlakoʼob bey wíinkoʼobeʼ. Le oʼolaleʼ, ka taal le Búulkabaloʼ, maʼ kíimoʼobiʼ. Tu kaʼa sutubaʼob iikʼil, ka suunajoʼob teʼ kaʼan bey ángeloʼobeʼ. Baʼaleʼ, maʼ chaʼab u kaʼa beetkubaʼob u ángeloʼob Diosiʼ. Tu beetubaʼob u ángeloʼob Satanás. Teʼ Bibliaoʼ kiaʼalaʼal tiʼe ángeloʼobaʼ, kʼaakʼas pixanoʼob.

Beooraaʼ Dioseʼ tu beetaj u máan upʼéel iikʼ, ka káaj u saʼapʼal u jaʼi le búulkabaloʼ. Ku tsʼoʼokol u máan cinco meseseʼ le cheemoʼ etsʼlaj yóokʼol upʼéel wits. Máan yaʼab kʼiinoʼob ka páatchaj u yilaʼal u kaʼanlil le witsoʼob tumen le yanoʼob ichil le cheemoʼ. Le jaʼoʼ láayliʼ táan u bin u saʼapʼaleʼ.

Noé túuneʼ tu jáalkʼabtaj utúul box chʼíichʼ u kʼaabaʼeʼ cuervo. Le chʼíichʼaʼ ku xikʼnal junsúutukeʼ ku suut, tumen minaʼan tuʼux u tʼúuchul. Bey úuchik u sen beetkoʼ, jeʼel jaytéen ka suunakeʼ ku tʼúuchul yóokʼol le cheemoʼ.

Noeiʼ u kʼáat u yojéelt kaʼach wa tsʼoʼok u saʼapʼal le jaʼoʼ, le oʼolaleʼ, tu jáalkʼabtaj utúul paloma. Lelaʼ suunaj xan tumen minaʼan tuʼux u tʼúuchul. Noé túuneʼ tu kaʼa jáalkʼabtaj le palomaoʼ, le ka suunajeʼ tu taasaj u chan jéekʼ olivo. Le jaʼoʼ tsʼoʼok u saʼapʼal. Tu yóoxtéen ka tu jáalkʼabtaj Noé le palomaoʼ, maʼ suunajiʼ tumen tu kaxtaj tuʼux tikin utiaʼal u pʼáatal.

Beooraaʼ Dioseʼ tu tʼanaj Noé ka tiaʼalajtiʼ: Jóokʼen teʼ cheemoʼ. Jóoʼs tuláakal a láakʼtsilil yéetel le baʼalcheʼoboʼ. Maas tiʼ upʼéel jaʼab tu máansoʼob ichil le cheemoʼ. ¡Chéen máans ta tuukul bukaʼaj úuchik u kiʼimaktal u yóoloʼob tumen maʼ kíimoʼobiʼ!