Kɛ anannganman su nzue’n tɔli’n, saan sran mɔcuɛ cɛ yɛ be fiteli nun ɔn. Sanngɛ i sin’n, be osu’n wa trɛli maan be yoli sran kpanngban kpa. Kɛ nzue’n tɔli m’ɔ dili afuɛ ya nsan afuɛ ablenun nin nɲɔn’n (352), yɛ be wuli Abraamu ɔ. E wun kɛ Ɲanmiɛn dili i nda nga ɔ tali’n su, maan Abraamu wuli ba yasua kun, be flɛ i Izaaki. I sin’n, Izaaki wuli ba nɲɔn sanngɛ Zakɔbu yɛ Ɲanmiɛn fɛli i sa sieli i su ɔ.

Zakɔbu i mma’m be sɔnnin, i mma yasua’m be ti blu nin nɲɔn (12) yɛ ɔ wuli ba bla mun wie. Zakɔbu i mma yasua blu (10) be fa be ɲin be cili be sinma kan Zozɛfu, kpɛkun be yoli i atɛ kɛ kanga sa Ezipti lɔ. I sin’n, Zozɛfu wa yoli Ezipti lɔ sran dan kun. Kɛ awe dan kun kpɛnnin’n, Zozɛfu sali i niaan mun niannin, naan sɛ be awlɛn ba’n w’a kaci o. I sin’n, Zakɔbu i awlobo wunmuan’n, Izraɛlifuɛ’m be ɔli Ezipti. Kɛ be wuli Abraamu m’ɔ dili afuɛ ya nɲɔn afuɛ ablangwlan’n (290), yɛ i sɔ sa’n yoli ɔ.

Afuɛ ya nɲɔn afuɛ blu nin nnun (215) nga be bɛli i sin lɛ’n be nun’n, Ezipti lɔ yɛ be trannin ɔn. Kɛ Zozɛfu wuli’n, be kacili kanga Ezipti lɔ. I sin naan b’a wu Moizi, i yɛ Ɲanmiɛn fɛli i fa deli Izraɛlifuɛ mun Eziptifuɛ’m be sa nun ɔn. Akpasua NƝƆN’N i nun ndɛ’n kwlaa dili afuɛ ya mɔcuɛ afuɛ ablenun nin nso (857).