Abantu 8 fye e bapuswike Ilyeshi, lelo mu kuya kwa nshita, abantu balifulile sana. Ilyo papitile imyaka 352 apo Ilyeshi lyabeleleko, Abrahamu alifyelwe. Twalasambilila ifyo Lesa afikilishe ubulayo alaile Abrahamu ilyo amupeele umwana umwaume uo ainike ati Isaki. Pa bana babili aba kwa Isaki, Yakobo eo Lesa asalile.

Ulupwa lwa kwa Yakobo lwali ulukalamba. Akwete abana abaume 12, na bana bambi abanakashi. Abana bakwe abaume 10 balipatile umwaice wabo, Yosefe no kumushitisha ukuba umusha mu Egupti. Mu kupita kwa nshita, Yosefe aishileba kateka uwacindama mu Egupti. Ilyo kwaponene insala, Yosefe aeseshe bamunyina nga ca kuti balyalwike. Mu kuya kwa nshita, ulupwa lwa kwa Yakobo lonse ulwaleitwa ati abena Israele, lwakuukiile ku Egupti. Ici cacitike pa numa ya myaka 290 ukutula apo Abrahamu afyalilwe.

Pa myaka 215 iyakonkelepo, abena Israele baikele mu Egupti. Ilyo Yosefe afwile, baishileba abasha mu Egupti. Mu kuya kwa nshita, Mose alifyelwe kabili Lesa alimubomfeshe ukulubula abena Israele ukufuma mu Egupti. Mu CIPANDE 2, twalalanda pa fyalecitika ku bena Israele pa myaka 857.