I gat eit man nomo we oli laef tru long Bigfala Wota we i ron, be sloslo, namba blong ol man i kam antap gogo i gat plante taosen man long wol. Ebraham i bon 352 yia afta we Bigfala Wota i ron. Bambae yumi luk olsem wanem God i holem promes blong hem blong givim wan pikinini boe long Ebraham, nem blong boe ya Aesak. Aesak i gat tu pikinini boe blong hem. Be, long tufala boe ya, God i jusum Jekob blong i kam man blong hem.

Jekob i gat plante pikinini, 12 boe mo sam gel. Ol 10 faswan boe blong Jekob oli no laekem smol brata blong olgeta, Josef, ale oli salem hem blong i kam wan slef long Ijip. Biaen, Josef i kam wan bigfala rula long Ijip. Taem kakae i sot, Josef i traem ol brata blong hem, blong luk sipos oli rili jenisim fasin blong olgeta. Afta, ful famle blong Jekob, hemia ol man Isrel, oli muv i kam long Ijip. Samting ya i hapen 290 yia afta we Ebraham i bon.

Ol man Isrel oli stap 215 yia long Ijip. Afta we Josef i ded, oli kam ol slef long Ijip. Biaen, Moses i bon, mo God i yusum hem blong sevem ol man Isrel oli aot long Ijip. Haf TU i tokbaot 857 yia blong histri we ol samting ya oli hapen long hem.