Eitr lo itre atr ka mele pe qa ngöne la iwë, ngo thupene lai kola mana la itre matran, traqa koi itre thauzan la etrun. Ame hë ngöne 352 lao macatre thupene la iwë, hna hnaho Aberahama. Easë a öhne la aqane eatrën hnei Akötresieti la hnei Nyidrëti hna thingehnaean koi Aberahama, ene laka, hna hamën la ketre nekönatr trahmany, Isaaka la ëjen. Lue nekö i Isaaka trahmany, Iakobo la hna iën hnei Akötresie.

Nyimu nekö i Iakobo, truelof lao nekö trahmany, nge ihanekö jajiny. Hna methinë Iosefa hnene la itre mama i angeic trahmanyi ka ala treen, ene pe hna salemë angeic matre nyine hlue e Aigupito. E cili, Iosefa la ketre atr ka nyipi ewekë catr, ka cilën la musi e Aigupito. Ame hë la kola traqa la ketre jiin, hna tupath hnei Iosefa troa wange maine ujë hë la thiina ne la itre trejine me angeic. Celë hi matre feke më iwa asë pi Aigupito eë hnene la hnepe lapa i Iakobo, ene la angetre Isaraela. Ewekë lai ka traqa, 290 lao macatre thupene la hna hnaho Aberahama.

Hna mele hnene la itretre Isaraela e Aigupito, 215 lao macatre. Meci pi hi Iosefa, nge kolo pë hë a thahluë angatr. Thupene lai kola hnaho Mose, jiane huliwa i Akötresie nyine troa thepe Isaraela qaa Aigupito. Itre pengöne lai, hna melën ngöne la 857 lao macatre, a hna qejepengön hnene la Paatr HNAALUEN.