Seg uḥemmal n waman ar leslak si Maṣer
AḤRIC WIS 2
Seg uḥemmal n waman ar leslak si Maṣer
Ḥaca tmanya yemdanen i gmenɛen seg uḥemmal-nni n waman, lameɛna kra kra uɣalen d luluf. Seg uḥemmal n waman ar tlalit n Abṛaham (Ibṛahim) ɛeddan 352 iseggasen. A nwali amek i geṭṭef Ṛebbi lemɛahda-s asmi i gefka aqcic i Abṛaham. Aqcic-agi isem-is Isḥaq. Yuɣal Isḥaq yesɛa-d sin warrac; d win yeţţusemman Yeɛqub i gextaṛ Ṛebbi.
Yeɛqub yesɛa tawacult tameqrant n 12 n warrac d kra n tullas. Ɛecṛa seg warrac-agi keṛhen Yusef, gma-tsen amecṭuḥ. Ihi, zzenzen-t akken ad yuɣal d akli di Maṣer. Iɛedda kra n lweqt, Yusef yuɣal d aneḥkam ameqran di Maṣer. Asmi i d-yeɣli laẓ iṣeɛben, Yusef ijeṛṛeb atmaten-is akken ad iwali ma beddlen wulawen-nsen neɣ ala. Ɣer taggara, tawacult meṛṛa n Yeɛqub, yeɛni At Isṛayil (Isṛail), tṛuḥ ɣer Maṣer. Si tlalit n Abṛaham ar wass ideg i ṛuḥen ɛeddan 290 iseggasen.
At Isṛayil ɛacen di Maṣer 215 n sna. Asmi i gemmut Yusef, uɣalen d aklan dinna. Umbeɛd ilul-ed Musa i gessexdem Ṛebbi akken a d-isellek At Isṛayil si Maṣer. Aḥric wis sin a d-yeḥku 857 iseggasen n wayen yeḍran di zzman aqdim.
