ပှၤ​ပူၤဖျဲး​ထဲ​ဃိးဂၤ လၢ​ထံလုာ်ဘၢတၢ်​ဖးဒိၣ်​န့ၣ်လီၤ. ဘၣ်ဆၣ်​သနာ်က့ တုၤ​မ့ၢ်​အယံာ်​ဒီး ပှၤ​ဃိးဂၤ​ဟဲကဲထီၣ် ပှၤ​အကထိတဖၣ်​အက​ထိ​လီၤ. ထံလုာ်ဘၢတၢ်​ဝံၤ ယံာ် ၃၅၂ နံၣ်န့ၣ် အၤဘြၤဟၣ်​အိၣ်ဖျဲၣ်ဝဲဒၣ်လီၤ. ပ​သ့ၣ်ညါဘၣ် ယွၤ​ဟ့ၣ်​အၤဘြၤဟၣ်​ဖိခွါ​တဂၤ​လၢ​အမံၤ​မ့ၢ်​အံၤစဲး, ဒ်​အတၢ်စံးပာ်​အိၣ်​အသိးန့ၣ်လီၤ. လၢတၢ်န့ၣ်အလီၢ်ခံ, လၢအံၤ​စဲး​အဖိ​ခံဂၤ​အကျါ ယွၤ​ဃုထၢ​ယၤကိာ်​လီၤ.

ယၤကိာ်​အဟံၣ်ဖိဃီဖိန့ၣ် ဒိၣ်မး​လီၤ. အိၣ်ဒီး ဖိခွါ ၁၂ ဂၤ ဒီး​ဖိမုၣ်တဖၣ်လီၤ. ယၤကိာ်​အဖိခွါ​အဂၤ ၁၀ န့ၣ် သးဟ့​အပုၢ်ဒ့ဖိ​ဒီး ဆါလီၤအီၤဆူ အဲၤကူပတူး, ဒ်​ကုၢ်​အသိးန့ၣ်လီၤ. လၢခံန့ၣ် ယိၤသး​ကဲထီၣ် အဲၤကူပတုး​အပဒိၣ်​လၢ အကါဒိၣ်​တဂၤ​န့ၣ်လီၤ. ဖဲ​တၢ်သၣ်ဝံၤလီၤဒိ​အိၣ်ထီၣ်ဝဲ နးနးကလဲာ်​အခါ ယိၤသး​မၤကွၢ်​အဝဲၢ်တဖၣ် မ့ၢ်​အဆီတလဲ​အသး​လံဧါ, တဆီတလဲ​ဒံး​ဘၣ်ဧါ​န့ၣ်လီၤ. လၢခံန့ၣ် ယၤကိာ်​ဒီဟံၣ်ညါ, ပှၤအံၤစရ့လးဖိ ဒီဒူၣ်​ဒီထၢ ဟဲ​သုးလီၤအသးဆူ ကီၢ်အဲၤကူပတူး​အပူၤ​လီၤ. တၢ်န့ၣ် ကဲထီၣ်​ဖဲ အၤဘြၤဟၣ်​အိၣ်ဖျဲၣ်​ဝံၤ အနံၣ် ၂၉၀ အခါ​န့ၣ်လီၤ.

အံၣ်စရ့လး​ဖိတဖၣ် အိၣ်ဝဲဆိးဝဲ​လၢ​အဲၤကူပတူး​အပူၤ ယံာ် ၂၁၅ နံၣ်​လီၤ. ယိၤသး​သံ​ဝံၤအလီၢ်ခံ အဝဲသ့ၣ်​ကဲထီၣ်​ကုၢ်တဖၣ် လၢ​အဲၤကူပတူး​အပူၤ န့ၣ်လီၤ. လၢခံ မိၤၡ့​အိၣ်ဖျဲၣ်​ထီၣ်ဝဲ​ဒီး ယွၤ​သူ​အီၤ​လၢ က​အုၣ်က့ၤခီၣ်က့ၤ ပှၤအံၣ်စရ့လးဖိတဖၣ် လၢ​အဲၤကူပတူး​အပူၤ​န့ၣ်လီၤ. တၢ်နီၤဖး ၂ န့ၣ် ပာ်ဖျါထီၣ်​တၢ်စံၣ်စိၤတဲစိၤ​လၢ အနံၣ် ၈၅၇ အကတီၢ်​န့ၣ်လီၤ.