Abantu basanu na batatu e bapulukile ku Bulobe bwa menda, pano pakupita kwa mpindi balifulile kabafika ne masausande aengi. Popele, palipitile imyaka 352 ukufuma apo kwabelele Ubulobe bwa menda, Ablaamu alifyelwe. Tulasambilila ifi baLesa balamine ukulaya kwabo pa kupela Ablaamu umwana uwailicilwe Isaci. Popele, pa bana bakwe Isaci bobilo, Yakobi alisalulwilwe na baLesa.

Yakobi alikwete ulupwa ulukulu ulwa bana abalalume 12 na bambi abana abanakasi. Abana bakwe Yakobi 10 balipatile umwanice wabo Josefi kabili balimusitisye ukubo’musya mu Ijipiti. Mukupita kwa mpindi Josefi alibele cilolo icikulu mu Ijipiti. Ili kwabele insala iyakuti, Josefi alyesesye abakwabo pakweba’ti abone kani balyalwile imitima yabo. Mukupelako, ulupwa lwakwe Yakobi lonse, abaIslaeli, lwalikukile ku Ijipiti. Ifi fyalicitikile imyaka 290 ukufuma apo Ablaamu afyalilwe.

Pa myaka iyakonkelepo 215 abaIslaeli balukwikala mu Ijipiti. Ili Josefi afwile, balikakilwe kwenka kulya. Mukupita kwa mpindi, Mose alifyelwe, na baLesa balimupyungisye ukulubula abaIslaeli ukufuma mu Ijipiti. Syonse pamo, imyaka 857 isya lyasi lya kale silukulabilwapo mu Ciputusya ca BUBILI.