TAXELOL 2

Peua keman tetsaujkakiouik uan tami keman kiskej Egipto

Sayoj chikueyi taltikpakneminij makiskej itech Tetsaujkakiouit, sayoj ika, keman panok xiujmej motelmiakilijkej. Ompa, 352 xiujmej satepan keman tetsaujkakiouik, nemik Abraham. Timomachtiskej keniuj Dios kichiuak tein motenkaujka iuan Abraham keman kimakak se konet tein motokaytij Isaac. Satepan, ome konemej tein kinpiak Isaac, Dios kijitak Jacob.

Jacob kinpiak miakej ichankauan, katkaj 12 okichpipil uan seki siuapipil. Majtakti ikoneuan Jacob kitauelitakej imin ikniuj José tein okachi telpoch katka, uan kinamakakej Egipto maj ompa kiteltekitiltianij. Satepan, José kipiak se ueyi tanauatil kemej tekiuaj itech altepet Egipto. Keman kinajsik se mayan, José kichiuak teisa uan ika kinitak ikniuan ox kipatakajya imin tanemilil. Satepan nochin ichankauan Jacob, tein moixmatkej kemej israelitas, mokaltalitoj Egipto. Nejin mochiuak 290 xiujmej satepan keman nemik Abraham.

Okseki 215 xiujmej israelitas nenkej Egipto, uan ompa kinteltekitiltijkej satepan keman momikilij José. Keman panok tonalmej nemik Moisés, uan Dios kititanik maj kinkixtiti israelitas Egipto. Nochi tein mochiuak itech Taxelol OME, panok 857 xiujmej.