Parte 2

Apachiuilistli niman ontlami ijkuak makisaj itech Egipto

San chikueyi tlaltikpakchanejkej omakiskej ipan Apachiuilistli, san ika, opanok miyek xiujtin niman melak omiyekiyakej. Kuakon, opanok 352 xiujtin ika yopanoka Apachiuilistli, niman otlakatiko Abrahán. Tiuelij kenon toTajtsin okichiuj tlen okijlika Abrahán ika kimakaskia se ikoneuj itoka Isaac. Kuakon, itech ome ikoneuj Isaac, toTajtsin okitlapejpeni Jacob.

Jacob okipix miyekej ichanejkauan, 12 ikoneuan telpokamej niman sekimej ichpokauan. Majtlaktli ikoneuan Jacob okitlauelitakej imikniuj akin xokoyotl, José, okinemakakej niman otekit kentla se tlakeuajli itech Egipto. Sakin, José onochiuj se ueyixtika tlanauatijketl ipan Egipto. Ijkuak opanok se apistli, José okintlatlatak ikniuan niman ijkon okitak tla yokipatlakaj intlanemililuan. Nochi ichanejkauan Jacob, israelitas, ochantitoj Egipto. Ijkuak otlakatiko Abrahán opanok 290 xiujtin ijkuak onochiuj yejuin.

Ipan okseki 215 xiujtin, israelitas onenkej Egipto. San ika, ijkuak omik José, melak chikauak okintekitiltijkej ompa, kentla tlakeualtin. Sakin, otlakatiko Moisés, niman toTajtsin okichiuj yejua makinmakixti israelitas itech Egipto. Ika nochi, opanokej 857 xiujtin ipan Parte OME.