Ekicweka 2

Okuruga aha Mwegyemure Okuhika aha Kuzaahuurwa Kuruga Omuri Misri

Abantu munaana bonka bakakira omwegyemure, kwonka bwanyima bakeyongyera omuhendo baaba enkumi n’enkumi. Bwanyima y’emyaka 352 Omwegyemure guherize kubaho, Abrahamu akazaarwa. Nitwega ngu Ruhanga akahikiiriza okuraganisa kwe arikuha Abrahamu omwana orikwetwa Isaaka. Bwanyima, ahari batabani ba Isaaka babiri, Yakobo akatooranwa Ruhanga.

Yakobo akaba aine eka mpango, aboojo 12 hamwe n’abaishiki. Batabani ba Yakobo 10 bakanga murumuna waabo Yosefu batyo baamuguza omu buhuuku omuri Misri. Bwanyima, Yosefu akaba omutegyeki mukuru omuri Misri. Enjara mbi ku yaateire, Yosefu yaagyeza barumuna be kureeba yaaba baabaire baahindwire emitima yaabo. Aha muheru, eka ya Yakobo yoona, nibo Baisraeli, bakaza Misri. Eki kikabaho emyaka 290 bwanyima y’okuzaarwa kwa Abrahamu.

Okumara emyaka endiijo 215 Abaisraeli bakaba nibatuura omuri Misri. Yosefu ku yaaherize kufa, baahinduka abahuuku okwo. Obunaku ku bwahingwireho, Musa yaazaarwa, kandi Ruhanga yaamwejunisa okujuna Abaisraeli kuruga Misri. Omuri byona, emyaka 857 y’ebyafaayo neegambwaho omu Kicweka kya KABIRI.