Se̱he̱ hñäto yä jäꞌi bi bongi de näꞌä rä Däta däyꞌe, pe mi thogi yä je̱ya bi xu yä mꞌotho yä jäꞌi. ꞌNepu̱, 352 yä je̱ya mꞌe̱fa de näꞌä rä Däta däyꞌe, bi mꞌu̱i rä Abraan. Ma gä pädihu̱ hanja Äjuä bi kumpli näꞌä xki ñäꞌti rä Abraan nuꞌmu̱ bi umbi nꞌa rä tꞌu̱ mrä thuhu rä Isak. ꞌNepu̱ de nuꞌu̱ yoho yä tꞌu̱ rä Isak, Äjuä go bi huahni rä Jakob.

Rä Jakob bi me̱ꞌtsi nꞌa rä däta familia, bi me̱ꞌtsi 12 yä tꞌu̱ ꞌne rꞌa yä tꞌixu. Nuꞌu̱ 10 yä tꞌu̱ rä Jakob bi u̱tsa näꞌä rä tꞌu̱kä ku mrä thuhu rä Jose. Hänge bi mapäbi rꞌa yä jäꞌi pa dä mꞌe̱go ha Ejipto. Mꞌe̱fa, rä Jose bi zo̱ho̱ bi me̱ꞌtsi nꞌa rä däta nsu de gä ndä ha Ejipto. Mi nja nꞌa rä däta thuhu, rä Jose bi tsapi nuꞌu̱ yä ku pa dä hyandi mu̱ ya xki paati nuꞌu̱ yä mfeni. Gatꞌho rä familia rä Jakob, yä israelita, bi uadi bi ma gatꞌho ha Ejipto. Bi thogi njaua 290 yä je̱ya mꞌe̱fa de xki mꞌu̱i rä Abraan.

Dende geꞌmu̱ yä israelita bi mꞌu̱ 215 yä je̱ya ha Ejipto. Mꞌe̱fa de bi du rä Jose, nuyu̱ bi zo̱ho̱ bi mꞌe̱go ha Ejipto. Bi thogi yä je̱ya, ꞌne bi mꞌu̱i rä Moises, Äjuä bi huahni nunä rä ñꞌo̱ho̱ pa bi gu̱ki yä israelita de Ejipto. Gatꞌho nuꞌu̱ yä thogi mää ha nunä RÄ NTHEKE 2, bi zitsꞌi 857 yä je̱ya.