Ŵanthu 8 pe ndiwu angupozomoka panyengu ya Zandi, kweni m’kuluta kwa nyengu angwamba kwandana. Kutuwa panyengu ya Zandi pangujumpha vyaka 352, ndipu Abrahamu wawangaku. M’chigaŵa ichi tisambirengi mo Chiuta wangusungiya phanganu laki pakupaska Abrahamu mwana munthurumi, zina laki Yisaki. Ndipuso tisambirengi za ŵana anthurumi ŵaŵi ŵaku Yisaki, kweniso po Chiuta wangusankhiya Yakobe.

Yakobe wenga ndi banja likulu la ŵana anthurumi 12 kweniso ŵana anthukazi. Ŵana anthurumi ŵaku Yakobe atinkhanga mvurwa wawu Yosefe ndipu angumuguliska ku Egipiti kuti wakaje kapolu. Pavuli paki, Yosefe wanguzija fumu yakuzirwa m’charu cha Egipiti. Kwati kwawa chilala, Yosefe wangwesa abali ŵaki kuti wawoni asani ŵasintha nkharu yawu. Pakumaliya, banja losi laku Yakobe lo lenga mtundu wa Yisraele lingusamiya ku Egipiti. Ivi vinguchitika pati pajumpha vyaka 290, Abrahamu wati wawaku.

Ayisraele anguja ku Egipiti vyaka vinyaki so 215. Yosefe wati wafwa, yiwu anguja akapolu. Pavuli paki, Mosese wanguwaku ndipu Chiuta wangumugwiriskiya ntchitu kuti wawombo Ayisraele ku Egipiti. Chigaŵa CHACHIŴI chikonkhoska mbiri ya vinthu vosi vo vinguchitika mu vyaka 857.