Ku ponile ntlhanu wa vanhu ni vanharu ntsena ka Ntalo, kanilezi vona va lo engetelekana va maha makume ya mazana ni makume ya mazana. Na ku hunzile 352 wa malembe anzhako ka Ntalo, Abrahama i lo pswalwa. Ha zi tiva lezi Nungungulu a nga hlayisisa zona xitsumbiso xakwe hi ku nyika Abrahama a n’wana wa mufana a vitwako Isaka. A ka vana vambiri va vafana va Isaka, Nungungulu i lo hlawula Jakobe.

Jakobe i lova ni ngango wa hombe wa 12 wa vana va vafana ni vanhanyana vo kari. Khume ga vana va vafana va Jakobe va lo venga nzisana yabye, Josefa, va mu xavisa wukhumbini le Gipite. Anzhako ka xikhati Josefa i lo maha mufumeli wa hombe wa Gipite. Loku ku chikele ndlala ya hombe, Josefa i lo ringa vanakulobye kasi ku wona lezaku a timbilu tabye ti wa hunzulukile ke. Hi kugumesa, wontlhe ngango wa Jakobe, a va ka Israeli, wu lo rura wu ya Gipite. Lezo zi mahekile a 290 wa malembe anzhako ka kupswalwa ka Abrahama.

A ka 215 wa malembe ma nga lanzela a va ka Israeli va lo hanya le Gipite. Anzhako ka kufa ka Josefa, vona va lo maha tikhumbi kwaseyo. Hi kufamba ka xikhati ku lo pswalwa Mosi. Nungungulu i lo mu tirisa kasi ku tlhatlhisa va ka Israeli hi le Gipite. A Xipanze xa WUMBIRI xontlhe xi eneta a 857 wa malembe ya matimu.