Ndi vhathu vha malo fhedzi vho ponyokaho Maḓi Mahulu, fhedzi tshifhinga tshi tshi ya vha engedzea vha vha zwigidi zwinzhi. Zwenezwo, miṅwaha ya 352 nga murahu ha Maḓi Mahulu, Abrahamu a bebwa. Ri guda uri Mudzimu o vhulunga fulufhedziso ḽawe hani nga u fha Abrahamu murwa a vhidzwaho Isaka. Zwenezwo, kha vharwa vha Isaka vhavhili, Yakobo a khethwa nga Mudzimu.

Yakobo a vha na muṱa muhulwane wa vharwa vha 12 na vhananyana. Vharwa vha Yakobo vha 10 vha vhenga murathu wavho Yosefa vha mu rengisela vhupulini Egipita. Nga murahu, Yosefa a vha muvhusi muhulwane wa Egipita. Musi hu tshi ḓa nḓala mmbi, Yosefa a linga vhakomana vhawe u vhona arali vho shandula dzimbilu. Mafheleloni, muṱa woṱhe wa Yakobo, Vhaisiraele, vha pfulutshela Egipita. Izwi zwo itea miṅwaha ya 290 nga murahu Abrahamu o bebwa.

Miṅwaha ya 215 i tevhelaho Vhaisiraele vho vha vha tshi dzula Egipita. Yosefa o no fa, vha vha dziphuli henengei. Tshifhinga tshi tshi ya, Mushe a bebwa, nahone Mudzimu a mu shumisa u vhofholola Vhaisiraele Egipita. Kha zwoṱhe, ho putelwa miṅwaha ya 857 ya ḓivhazwakale kha Tshipiḓa tsha vhuvhili.